हेल्थ टिभी अनलाइन\भक्तपुर श्वासप्रश्वास पुनःस्थापना केन्द्र निर्माण एवं सञ्चालनका लागि जापानी दूतावास, जापानको एक संस्था र भक्तपुर नगरपालिकाबीच सम्झौता भएको छ।

जापान अन्तर्राष्ट्रिय चिकित्सा प्रविधि संस्था (जिम्टेफ) को प्राविधिक तथा आर्थिक सहयोगमा भक्तपुर नगरपालिका–९ तुमचोमा निर्माणाधीन श्वासप्रश्वास पुनःस्थापना केन्द्रको दोस्रो चरणको सम्झौता सम्पन्न भएको नगरपालिकाका प्रमुख सुनिल प्रजापतिले जानकारी दिए।

केन्द्रको भवन निर्माण तथा चिकित्सा उपकरण खरिदपश्चात नेपाली चिकित्सकहरूलाई उपचारसम्बन्धी तालिम दिने तथा जापानी विज्ञहरूको उपस्थितिमा उपचार गराउनेबारे सम्झौता भएको हो।

जापानी दूतावासमा बिहीवार आयोजित समारोहमा नेपालका लागि जापानी राजदूत सामिची साइगोले जापानका वरिष्ठ सरकारी चिकित्सकहरूको संस्था जिम्टेफको सहयोगमा भक्तपुर नगरपालिकाले स्थानीय जनताको सहभागिता र उपभोक्ता समितिमार्फत केन्द्रको भवन निर्माण गरेकामा खुशी व्यक्त गरे।

जिम्टेफका नेपाल प्रतिनिधि मायदा नोरिकोले भक्तपुरमा श्वासप्रश्वास पुनःस्थापन केन्द्र सञ्चालनको तीनवर्षे योजनाअन्तर्गत पहिलो वर्षको भवन निर्माण र उपकरण खरिद प्रक्रिया सम्पन्न भएको बताए। दोस्रो वर्षमा नेपाली चिकित्सकहरूलाई उपचार विधिबारे तालिम सञ्चालन गरी बिरामीको उपचार शुरु गर्ने तयारी भइरहेको उनले जानकारी दिए।

जिम्टेफले भक्तपुर नगरपालिकालाई केन्द्रको भवन निर्माणका लागि निःशर्त एक करोड ७० लाख रुपैयाँ आर्थिक सहयोग प्रदान गरेको हाे। नगरपालिकाले आफ्नै पाँच आना तीन पैसा तीन दाम क्षेत्रफलको जग्गामा उपभोक्ता समितिमार्फत भवन निर्माण कार्य सम्पन्न गरेको जनाएकाे छ।

केन्द्रमा दीर्घ दम र खोकी रोगका बिरामीलाई फिजियोथेरापी विधिबाट उपचार सेवा प्रदान गरिने र त्यसका लागि आवश्यक चिकित्सकीय उपकरण जडान गर्ने कार्य भइरहेको छ। आगामी चैत ३ गतेदेखि उपचार सेवा शुरु गरिने भएको छ।

रासस

हेल्थ टिभी अनलाइन\काठमाडाैं :  वागमती प्रदेशका मुख्यमन्त्री डोरमणि पौडेलले कोरोना भाइरसबाट बच्न संवेदनशील हुन अपिल गरेका छन्। शुक्रवार सन्देश जारी गरी मुख्यमन्त्री पौडेलले कोरोना भइरसबाट बच्न प्रदेश सरकारले पूर्वतयारी गरिरहेको बताए।

सन्देशमा उनले छिमेकी मित्रराष्ट्र चीनमा महामारीका रूपमा फैलिएको नयाँ कोरोना भाइरसको संक्रमणले त्यहाँ पुर्याएको मानवीय क्षति तथा अर्थतन्त्रमा परेको असरप्रति दुःख व्यक्त गरेका छन्।

‘यो भाइरस संसारका विभिन्न ५० भन्दाबढी देशमा फैलिरहेको यथार्थबाट हामी जहाँ रहे पनि अत्यन्तै सावधान र सजग हुनु जरुरी छ’, उनको सन्देशमा भनिएको छ, ‘यस्तो अवस्थामा ती देशमा रहेका नेपाली नागरिकलाई महामारीबाट जोगिन अपनाउनुपर्ने सबै प्रकारका सावधानी अपनाउन हार्दिक अनुरोध गर्दछु।’