‘कोभिड १९’ नाम दिइएकाे कोरोना भाइरसका कारण वुहानमा एकैदिन बुधबार मात्रै २४२ जनाको मृत्यु भएको छ। यसैगरी १४ हजार ८४० नयाँ बिरामी अस्पताल भर्ना भएका छन्।

योसँगै हुबे प्रान्तमा मात्रै ४८ हजार २०६ जनामा कोरोना भाइरस भेटिएको छ। अस्पताल भर्ना भएकामध्ये ५ हजार ६४७ जना सिकिस्त रहेको बताइएको छ। सबै गरी संक्रमित संख्या ६० हजार बढी नाघेको चीनको राष्ट्रिय स्वास्थ्य आयोगले जनाएको छ।

सबैभन्दा बढी संक्रमित र मृत्यु पनि वुहानमै भएको आयोगले जनाएको छ। रोग पहिचान र उपचारलाई जति तिव्रता दिइएको छ, संक्रमित र मृत्यु हुनेको संख्या पनि बढेको आयोगले जनाएको छ।

अन्य दिन भन्दा बुधबार मृत्यु हुनेको संख्या ह्वात्तै बढेको हो। चीनमा बुधबारसम्म कोरोना भाइरसका कारण मृत्यु हुनेको संख्या एक हजार ३१० पुगेको पनि आयोगले पुष्टि गरेको छ। तर मृत्यु हुनेको संख्या सरकारी तथ्यांक भन्दा धेरै नै हुनुपर्ने विज्ञहरूले बताउँदै आएका छन्।

काठमाडौं : चीनको वुहान शहरमा कोरोना भाइरसका कारण ज्यान गुमाउनेको सम्झनामा काठमाडौँमा दीप प्रज्ज्वलन गरिएको छ।

ट्रान्स हिमालय डेभलपमेन्ट सेन्टरले राष्ट्रिय सभागृहमा आयोजना गरेको कार्यक्रममा बुधवार दीप प्रज्ज्वलन गरेका हुन्। कार्यक्रममा भूमि व्यवस्था, सहकारी तथा गरिबी निवारणमन्त्री पद्माकुमारी अर्याल, नेपालका लागि चीनकी राजदूत होउ यान्छीलगायत सहभागी थिए।

मन्त्री अर्यालले नेपालको विपत्तिमा पटक–पटक सहयोग गर्दै आइरहेको चीनलाई परेको विपत्तिमा सक्दो सहयोग गर्न तयार रहेको बताइन्। राजदूत यान्छीले कोरोनाविरुद्धको अभियानमा नेपालले दर्शाएको सदासयताले चीनलाई थप ऊर्जा प्रदान गरेको प्रतिक्रिया दिइन्।

कार्यक्रममा कलाकार, साहित्यकारले कोरोनाविरुद्धको अभियानमा चीनलाई परेको विपत्तिमा ‘हामीसँगै छौँ’ भन्दै गीत, कविता प्रस्तुत गरे।