शेर भण्डारी\ डडेल्धुरा : सुदूरपश्चिमका मात्रै क्वारेन्टाइनमा एक सातामा ७ जनाले ज्यान गुमाएका छन्। आइतबारसम्म चार जिल्लाका गरी ७ जनाको क्वारेन्टाइनमा ज्यान गएको हो।अहिलेसम्म बैतडी, डडेल्धुरा र बाजुराको क्वारेन्टिनमा २\२ जना र डोटीको क्वारेन्टिनमा १ जनाको मृत्यु भएको छ।

मृत्यु हुनेमध्ये चार जनाको कोरोना परीक्षण भएकोमा तीन जनाको रिपोर्ट नेगेटिभ आएको छ भने एक जनाको रिपोर्ट पोजेटिभ आएको छ। तीन जनाको भने कोरोना परिक्षण हुन बाँकी नै रहेको छ।

आइतबार विहान डोटीको केआईसिंह गाउँपालिका–३ को सिताराम आधारभूत विद्यालयमा रहेको क्वारेन्टाइनमा १९ वर्षीय युवकको मुत्यु भएको हो। भारतको लुधियानाबाट १९ गते डोटी पुगेका उनी २० गतेदेखि गाउँपालिकाले व्यवस्थापन गरेको उक्त क्वारेन्टाइनमा बस्दै आएका थिए।

मृतकको स्वाब संकलनका लागि टोली पठाइसकेको स्वास्थ्य कार्यालय डोटीका प्रमुख रमेश मलासीले बताए । उनले भने, ‘उक्त क्वारेन्टिनमा रहेका १० जनाकै स्वाब संकलन गरी आजै धनगढी पठाउछौं, साँझसम्म  रिपोर्ट आउँछ।’ उनले रिपोर्ट नआएसम्म शव नउठाइने जानकारी दिए ।

यस्तै भारतबाट फर्किएर बैतडीको पाटन नगरपालिका–६ स्थित भीमदत्त प्राविधिक शिक्षालयको क्वारेन्टाइनमा बसेका पाटन नगरपालिका–६का ३१ वर्षीय पुरुषको शनिबार राति करिब साढे ८ बजे मृत्यु भएको हो।

उनी शनिबार बिहान मात्रै भारतको बेंगलोरबाट पाटन आइपुगेका थिए। साँझ एकाएक बेहोस भएका उनलाई उपचारका लागि पाटन प्राथमिक स्वास्थ्य केन्द्र लगिएको थियो। उपचारकै क्रममा उनको मृत्यु भएको पाटन प्राथमिक स्वास्थ्य केन्द्रका स्वास्थ्य सहायक प्रेमसागर भट्टले जानकारी दिए।

मृतकको स्वाब संकलन गरी परीक्षणका लागि धनगढी पठाइएको पाटन नगरपालिकाका स्वास्थ्य शाखा प्रमुख मदनसिंह महराले जानकारी दिए। यसअघि भारतबाट आएर क्वारेन्टाइनमा बसेकी एक महिलाको जेठ २० गते मृत्यु भएको थियो। पुर्चौडी नगरपालिका–४ भटनास्थित मालिका माध्यमिक विद्यालयको क्वारेन्टिनमा बसेकी २२ वर्षीया महिलाको कोरोना पीसीआर रिपोर्ट भने नेगेटिभ आएको छ।

बाजुराको खप्तड छेडेदह गाउँपालिका–७ मष्टा आधारभूत विद्यालयको क्वरेण्टीनमा पनि एक वृद्धको ज्यान गएको छ। ६५ वर्षका वृद्ध जेठ १६ गतेदेखि क्वारेन्टाइनमा बसेका थिए।

त्यसअघि प्रदेशमा पहिलो संक्रमितको मृत्यु भएको थियो। १८ जेठमा बाजुरामा कोरोना संक्रमणबाट एक बालिकाको मृत्यु भएको हो। बाजुराको बुढीगंगा नगरपालिका–१ स्थित धुरालसैन माविको क्वारेन्टाइनमा बसेकी बालिकाको बाजुरा अस्पतालमा मृत्यु भएको थियो। उनी बाबु आमासँगै भारतबाट आएकी थिइन्।

डडेल्धुरामा पनि घर फर्किएकी महिला र एक बालकको ज्यान गएको छ। गन्यापधुरा गाउँपालिका–१ असिग्राम आधारभुत विद्यालय रौनाकोट क्वरेण्टीनमा ३० वर्षीया महिलाको ज्यान गएको हो। उनी श्रीमान् सहित १६ गते भारतबाट आएकी थिइन् ।

यसअघि डडेल्धुराको नवदुर्गा गाउँपालिका–३का साढे ६ वर्षीय बालकको क्वारेन्टाइनमा मृत्यु भएको थियो। उनको जिल्ला सदरमुकाम नजिकै रहेको डडेल्धुरा बहुमुखी क्याम्पसको क्वारेन्टाइनमा मृत्यु भएको हो। आमाबाबुसँगै उनी केही दिनअघि भारतको मुम्बईबाट गौरीफन्टा नाका हुँदै डडेल्धुरा पुगेका थिए।

हेल्थ टिभी अनलाइन\डडेल्धुरा : डोटीको क्वारेन्टाइनमा बसेका एक युवकको मृत्यु भएको छ । डोटी केआई सिंह गाउँपालिका–३ को सिताराम आधारभूत विद्यालयमा रहेको क्वारेन्टाइनमा १९ वर्षीय युवकको आज बिहान मुत्यु भएको हो ।

भारतको लुधियानाबाट १९ गते डोटी पुगेका उनी २० गतेदेखि उक्त क्वारेन्टाइनमा बस्दै आएका थिए। आइतबार बिहान करिब ३ बजे उनको मृत्यु भएको स्थानीय शेरबहादुर ऐरले जानकारी दिए । उनी पहिलेदेखि नै मुटुको रोगी भएको बुझिएको छ ।

मृतकको कोरोना परीक्षणका लागि स्वाब संकलनका लागि टोली क्वारेन्टाइनतर्फ गएको बताइएको छ ।