जाडोमा तिलको लड्डु खाने चलन छ। काँचै तिल वा भुटेर सख्खरमा मुछेर लड्डु बनाइन्छ। यस्तै विभिन्न किसिमका अचार बनाउँदा पनि तिल अनिवार्य मानिन्छ। तिलको छोप पनि कम स्वादिलो हुँदैन।

तिलका परिकार स्वादिलो त हुन्छ नै, स्वास्थ्यका दृष्टिले पनि यो निकै उपयुक्त मानिन्छ। यो देख्दा सानो भए पनि क्याल्सियम, आइरन, म्याग्नेसियम, जिन्क र सेलेनियमले भरिपूर्ण हुन्छ।

खराब कोलेस्ट्रोल दूर

तिलमा मोनो स्याचुरेटेड फ्याटी एसिडले शरीरमा भएको खराब कोलेस्ट्रोल नष्ट गर्छ र शरीरमा आवश्यक कोलेस्ट्रोलको मात्रा बढाउँछ। यसका कारण हृदयाघातको जोखिम कम हुन्छ।

स्वस्थ राख्छ मुटु 

तिलले मुटुको मांसपेशीलाई स्वस्थ राख्न मद्दत गर्छ। जसले मुटुको धड्कन नियमित बनाउँछ ।

बलियो बनाउँछ हड्डी 

१०० ग्राम तिलमा १८ ग्राम प्रोटिन पाइन्छ ।तिलमा डायटरी प्रोटिन तथा एमिनो एसिड पाइन्छ, जसले बालबालिकाको हड्डीको विकास गर्नुका साथै बलियो समेत बनाउँछ।

मधुमेहमा लाभदायक

तिलमा पाइने एन्टी ग्लिसेमिकले रगतमा रहेको ग्लुकोजको मात्रा ३६ प्रतिशत कम गर्छ। टाइप २ मधुमेहका बिरामीका लागि यो लाभदायक मानिन्छ ।

गर्भवतीलाई उपयोगी

तिलमा फोलिक एसिड पाइन्छ, जसले गर्भवती र गर्भमा रहेको शिशुको विकासमा मद्दत पुर्याउँछ।