डा सन्दीपलाई प्रश्न : घुँडा किन दुख्छ, कसरी बच्ने ?
आफनो जीवनकालमा लगभग सबैले कुनै न कुनै खालको घुँडाको दुखाइ महशुस गरेकै हुन्छन् । घुँडा दुख्नु कुनै प्राकृतिक हुन्छ भने कुनै कुनै अप्राकृतिक पनि हुने गर्छन । अर्थात जीवनशैलीका कारण पनि घुँडा दुख्ने हुन्छ । धेरै जसो घुँडा दुखाइ चोटपटकका कारण हुन्छ भने अर्को उमेरसँगै हड्डी खिइएर । यही घुँडा दुखाइ, यसको उपचार र सावधानीका विषयमा आरुस लाइफस्टाइल अस्पतालमा कार्यरत घुँडा तथा जोर्नी विशेषज्ञ डा सन्दीप भण्डारीसँग कल्पना आचार्यले गरेको कुराकानी उनकै शब्दमा :
घुँडा हाम्रो शरीरको महत्वपूर्ण जोर्नी हो । यसले पुरै शरीर धानेको हुन्छ । तर विविध कारणहरुले बेलाबखत घुँडामा दुखाइ हुनसक्छ । घुँडा दुख्ने पहिलो कारण त चोटपटक लाग्नु नै हो । चोटपटक जो कोहीलाई बच्चा, युवा, बुढाबुढी जोकोहीलाई लाग्न सक्छ । तर स साना बालबालिकाहरु यताउता बढी दौडिन्छन्, खेल्छन । यसो गर्दा लडेर चोटपटक लागेर घुँडा दुख्ने सम्भावना बढी हुन्छ । किशोरावस्थामा खेलकुदमा बढी लाग्ने हुुँदा उनीहरुमा खेलकुदका कारण चोटपटक लाग्न सक्छ । बुढ्यौली अवस्थामा हड्डी कमजोर भएका कारण आफै लडेर पनि चोटपटक लाग्न सक्छ । यसरी घुँडा दुख्ने पहिलो कारण चोटपटक नै हो ।
यसैगरी दोस्रो कारण भनेको उमेरसँगै हड्डी खिइँदै जाने कारणले पनि घुँडा दुख्ने हुन्छ । उमेर बढ्दै जाँदा शरीरको अन्य अंगमा रोग लागे जस्तै हड्डी, जोर्नीहरु पनि खिइँदै जान्छन, कमजोर हुँदै जान्छन जसले गर्दा घुँडा दुख्न थाल्छ । यो स्वभाविक प्रक्रिया हो । जब घुँडा खिइँदै जान्छ अनि दुख्न थाल्छ । कसैको ३० वर्षकै उमेरदेखि हड्डी खिइन थालेर समस्या देखिन्छ भने कसैको ४० \५० वा कसै कसैको ६० पछि हड्डी खिइन थाल्छ । कतिपय व्यक्तिको खानपान, जीवनशैलीमा पनि कहिले र कति हड्डी खिइने भर पर्छ । तर एकपटक चोटपटक लागेको घुँडा भने छिटै अर्थात उमेर नपुग्दै पनि खिइन थाल्छ । लिगामेन्ट च्यातियो भने पनि घुँडा चाँडो खिइन्छ । घुँडाको स्याहार र प्रयोग कहाँ कसरी भइरहेको छ भन्नेमा पनि घुँडा कति दुख्ने भन्ने हुन्छ ।
योसँगै घुँडा दुख्ने अर्को कारण बाथ रोग पनि हो । बाथ रोगले पनि घुँडा छिटो खियाउँछ र दुखाउँछ । बाथ रोग भएका व्यक्तिले पहिलेदेखि ध्यान दिन जरुरी हुन्छ । बाथको औषधि खाएर यसलाई केही हदसम्म नियन्त्रण गर्न सकिन्छ । समयमै बाथको औाषधि खाएमा जोर्नी खिइने समयलाई केही पछि धकेल्न सकिन्छ । औषधि खाएर निर्मूल पार्न नसकेपनि केही समय छिटो खिइने जोर्नीलाई केही समय अलि पछि लान भने प्रयास गर्न सकिन्छ । उमेर भएपछि कपाल फूले जस्तै हो हड्डी खिइने कसैको चाँडो कसैको ढिलो हुनसक्छ । जसरी कपाल फुल्नलाई रोक्न सकिन्न त्यसैगरी हड्डी खिइने प्रक्रिया पनि सम्पूर्ण रुपमा रोक्न सकिन्न । तर समयमै सावधानी अपनाएर धेरै हदसम्म यसबाट हुने जोखिमलाई कम गर्न पक्कै सकिन्छ ।
दुखाइ भइसकेपछि उपचारको कुरा गर्दा सर्वप्रथम घुँडा किन दुख्यो सो पत्ता लगाउन जरुरी हुन्छ । चोटपटकका कारण होकी ? कुनै रोगका कारण होकी ? वा जोर्नी खिइएर हो ? सो पत्ता लगाउनका लागि केही क्लिनिकल जाँच गर्नुपर्ने हुन्छ । त्यसपछि मात्र उपचारको प्रक्रिया कस्तो हुने थाहा हुन्छ र एक्सरे वा आवश्यक परेमा एमआरआई गर्नुपर्ने हुन्छ अनि समस्या पत्ता लगाउन । समस्या पत्ता लागेपछि सोही अनुसार उपचार सुरु हुन्छ । कसै कसैलाई औषधि र एक्सरसाइजबाट निको हुने समस्या हुनसक्छ भने कतिपयको समस्या गम्भीर भएर हिंडडुलमै समस्या हुन थालेमा, खुट्टा नै बांगिन थालेमा घुँडाको जोर्नी प्रत्यारोपण गर्न सकिन्छ । घुँडाको जोर्नी प्रत्यारोपणपछि सक्रिय जीवनयापनमा निकै सहयोग पुग्छ । यो शल्यक्रिया नेपालमै सम्भव छ । जस्तोसुकै हाडजोर्नीको उपचारदेखि जोर्नी प्रत्यारोपणसम्म यहीं हामीले नियमित गरिरहेका छौं ।
अब सावधानी कसरी अपनाउने त भन्ने कुरा गर्दा पहिलो कुरा त घुँडामा सकेसम्म चोटपटक लाग्न दिन भएन । उमेरसँगै हड्डी खिइने समस्या भएमा विशेषज्ञ चिकित्सकको सल्लाह अनुसार खानपान, एक्सरसाइज तथा औषधिको सेवन गर्न जरुरी हुन्छ । उमेर बढ्दै गएपछि घुँडालाई धेरै भार पर्ने काम नगर्ने, बढी उकालो ओरालो नगर्ने तथा कुनै सपोर्ट लिएर हिंडडुल गर्दा लड्नबाट जोगिन सकिन्छ । यसका साथै धेरै जनाको घरमा बाथरुम चिप्लो भएका कारण बाथरुममा चिप्लेर लड्नेहरु पनि धेरै छन् । यो जोखिमलाई मध्यनजर गर्दै बाथरुमलाई सुस्खा राख्ने तथा खस्रो टायल हाल्ने गर्न जरुरी हुन्छ । बुढाबुढीमध्ये अधिकांशको चोटपटकको कारण बाथरुममा चिप्लिएर हुने गरेको पाइन्छ । त्यसैले घरमा बुढाबुढी भएमा बाथरुममा धेरै नै ध्यान दिन जरुरी छ । अर्को कुरा बाथरुम उज्यालो पनि हुन जरुरी हुन्छ । उज्यालोमा लड्ने सम्भावना कम हुन्छ । यसैगरी बढी मोटा व्यक्तिहरुको घुँडामा बढी भार पर्छ र घुँडा बढी खिइन्छ र दुख्छ । त्यसैले मोटोपन भए यसलाई घटाउन आवश्यक हुन्छ ।
यसैगरी स्वस्थकर खानपान तथा नियमित एक्सरसाइज पनि स्वस्थ घुँडाको अर्को उपाय हो । अन्य स्वास्थ्य जस्तै हाडजोर्नी बलियो र स्वस्थ राख्नका लागि आफनो खानपान एवम जीवनशैलीमा सुधार गर्नु सबैभन्दा महत्वपूर्ण हुन्छ । नियमित एक्सरसाइज गर्दा मांसपेशीहरु बलियो हुन्छन र जोर्नी लाई पनि मजवुत राख्न सहयोग गर्छन । त्यसैले एक्सरसाइज त घुँडाका लागि गर्नेपर्छ । नियमित एक्सरसाइज गर्नेको घुँडा नगर्नेको तुलनामा निकै बलियो हुन्छ । त्यसैले यी कुुुराहरुमा ध्यान दिन सकियो भने धेरै हदसम्म घुँडा दुख्नबाट जोगिन सकिन्छ ।
क्यान्सरबारे जनचेतनामूलक सन्देश दिने महजोडीको ‘के डेरा के घर’ टेलि चलचित्र
आज अन्तराष्ट्रिय नर्सिङ दिवस मनाइँदै
डा भगवान कोइरालाले बनाउन लागेको बाल अस्पताललाई मीनबहादुर गुरुङको ४१ करोड सहयोग
ड्रग रेसिस्टेन्ट क्षयरोग : क्षयरोग अन्त्यमा ठूलो चूनौती बन्दै
स्वास्थ्यमन्त्री ब्लूम्बर्ग जनस्वास्थ्य पुरस्कारका लागि आवेदन माग