‘मधुमेहका बिरामीले निराहार व्रत बस्न हुँदैन्’
हेल्थ टिभी अनलाइन : आज हरितालिका तीज अर्थात महिलाहरुको महान पर्व । हरितालिका तीजका दिन पानी पनि नखाएर व्रत बस्ने प्रचलन छ । तर केही यस्ता रोगहरु छन् जसमा यसरी व्रत बस्दा व्रतालुलाई जोखिम मात्र होइन ज्यानै समेत जानसक्छ । त्यसमध्येको एक रोग हो । मधुमेह अर्थात चिनी रोग । रगतमा चिनीको मात्रा बढी भएमा त्यसलाई चिनी रोग भनिन्छ । मधुमेहका बिरामीका लागि औषधि जति महत्वपूर्ण हुन्छ त्यसैगरी खानपान पनि महत्वपूर्ण हुन्छ । खानपानमा तलमाथि भएमा सुगरको लेबल कम वा बढी भएर ज्यानै तलमाथि हुनसक्छ । त्यसैले यस्ता बिरामीले आफनो अवस्थालाई ध्यानमा राखेर मात्र व्रत बस्ने वा चाडबाड मनाउने गर्नुपर्छ ।
व्रत बस्दा हाम्रो शरीरको पाचन प्रक्रियामा निकै परिवर्तन आउँछ । एउटा रुटिनमा रहेका मधुमेह भएका बिरामीलाई व्रतले तुरुन्त र पछिसम्म नकारात्मक असर गर्न सक्छ । त्यसैले मधुमेहका बिरामीले निराहार (पानी पनि नपिएर) व्रत बस्न हुँदैन ।
ज्यान रहे मात्र अन्य कुरा गर्न सकिन्छ । त्यसैले आफनो स्वास्थ्यभन्दा ठूलो व्रत हुन सक्दैन भन्ने कुरा बुझेर चाडबाड मनाउने योजना गर्दा राम्रो हुन्छ । इन्सुलिन लिइरहेका बिरामीले त व्रत कुनै पनि हालतमा बस्नै हुँदैन । मधुेमह नियन्त्रणका लागि औषधि सेवन गरिरहेका बिरामीले पनि निराहार व्रत होइन पानी प्रसस्त पिउने तथा फलफूल खाएर व्रत बसेको राम्रो । केही पनि नखाँदा एक्कासी सुगर लेबल घटेर बिरामी बेहोस हुने सम्भावना हुन्छ । अथवा व्रत तोडेर एक्कासी धेरै खाँदा सुगर लेबल बढेर समस्या गराउन सक्छ ।
यसैपनि मधुमेहका बिरामीको खानाको एउटा अनुशासित रुटिन हुनुपर्छ । अन्यथा सुगर लेबल नियन्त्रण हुन सक्दैन । चाडबाडका बेला आफू खुशी खाने वा व्रत बस्ने गर्नु आफनै ज्यान जोखिममा राख्नु हुनजान्छ । यदि व्रत बस्ने योजना छ भने पनि आफनो चिकित्सकसँग सल्लाह लिई कसरी व्रत गर्ने भन्ने सोध्न सकिन्छ । पानी विनाको व्रत त मधुमेहीले बस्न नै हुँदैन । यसका साथै व्रत बस्नु अघि आफनो सुगर लेबल कति छ ? सोको अनुगमन गर्न जरुरी हुन्छ । औषधिको सेवन कसरी गर्ने कसरी मात्रा मिलाउने खाना खाएर खानुपर्ने औषधि कसरी खाने जस्ता कुरा आफनो चिकित्सकलाई सोध्दा जोखिमबाट बच्न सकिन्छ । यदि यताउता गइएको छ भने आफनो साथमा औषधि बोकेर जान बिर्सन हुँदैन ।
मधुमेहका बिरामीले चाडबाड त हो भनेर दर खाने नाममा अनेकौं थरी खानेकुरा खान मिल्दैन । यसरी एकदिन त होनि भनेर खाँदा यसले सुगर लेबल बढाएर ठूलो समस्या निम्त्याउन सक्छ । त्यसैले आफनो रोगको ख्याल गर्दै ठिक्क मात्रामा आफूलाई सहन हुने गरी खानेकुरा खानुपर्छ । माइतीले पनि छोरी चेलीलाई वर्षमा एक दिन त हो नि भन्दै जर्बजस्ती खाना खुवाउनु भएन । यसले दीर्घ असर पुराउँछ भन्ने कुरा बुझिदिनुपर्छ ।
तीज पर्व महिलाहरुमा केन्द्रित छ । खाना धेरै खाने वा संस्कृति जोगाउने नाममा निराहार व्रत बस्ने भन्दा पनि आफू कसरी रमाउने, मन प्रफुल्लित हुने काम गर्न सकिन्छ । दिदीबहिनी मिलेर रमाइलो कुरा गर्ने, गित गाउने, नाच्ने गर्दा मन आनन्दित हुनसक्छ ।
तीज मनाऔं तर आफनो ज्यान जोखिममा राखेर चाहिं होइन । सबै जनाको तीज सुखमय होस्। तीजको धेरै शुभकामना !
कर्णालीमा पहिलोपटक कम्युनिटी मेन्टल हेल्थ सम्बन्धी अन्तराष्ट्रिय सम्मेलन हुँदै
क्यान्सर भएको पुष्टि भएका यूकेका राजा चार्ल्सले पुनः सार्वजनिक दायित्व निर्वाह गर्ने
न्युरोसाइन्स सम्बन्धी १४ दिने अन्तराष्ट्रिय वर्कशप काठमाडौंमा
कान्ति बाल अस्पतालले माग्यो ठूलो संख्यामा चिकित्सक तथा नर्स
जुनसुकै पालिकाको भए पनि अशक्त र गरिब नागरिकलाई काठमाडौं महानगरले नि:शुल्क उपचार दिने