हिजोआज बालबालिकादेखि वृद्धवृद्धासम्मलाई भिजन सिन्ड्रोमको समस्या देखिने गरेको छ । अधिकांश समय मोबाइल, ल्यापटप, कम्प्युटर र टेलिभिजनसँग बित्ने गरेकाले यस्तो समस्या देखिने गरेको हो।

कम्प्युटरमा लामो समय लगातार काम गर्ने कर्मचारी, पत्रकारलगायतमा पनि आँखा पोल्ने र दुख्ने समस्या देखिन्छ । कम्प्युटर र मोबाइलमा भिडियो हेर्ने, गेम खेल्ने बालबालिकालाई पनि आँखा र टाउको दुख्ने समस्या निम्तिन्छ।

कम्प्युटरमा बढी नजिक बसेर गेम खेल्दा र हेर्दा आँखाको शक्तिको बढी प्रयोग हुन्छ । जसले गर्दा सानै उमेरमा पनि चश्मा लगाउनुपर्ने बाध्यता निम्तिन्छ।

यो समस्याबाट बच्न अनावश्यक रूपमा मोबाइल खेलाउने, कम्युटरमा बस्ने गर्नु हुँदैन। बालबालिकाको हातमा जथाभावी मोबाइल दिनुहुँदैन। कम्प्युटर धेरै समय बसेर काम गर्नेहरूले वेलावेला आँखालाई विश्राम दिनुपर्छ।

कम्प्युटरमा काम गर्नेहरूका लागि विशेष खालको चश्मा पाइन्छ। याे लगाएर काम गर्दा पनि समस्या कम हुन्छ।