हेल्थ टिभी अनलाइन \काठमाडौं : मुटुरोग विशेषज्ञ डा ओम मूर्ति अनिलले २ विश्व रेकर्ड कायम गर्न सफल भएका छन् । विश्व मुटु दिवसको अवसर पारेर सेप्टेम्बर २९, २०२३ मा डा ओम मूर्तिले आफनो फेसबुक पेजबाट मुटुरोग सम्बन्धी सचेतनामूलक लाइभ प्रस्तुतीबाट विश्व रेकर्ड कायम गरेका हुन् ।

फेसबुक लाइभमा कार्डियोभास्कुलर स्वास्थ्य सचेतनाका लागि सबैभन्दा बढी दर्शक भन्ने शिर्षकमा डा मूर्तिले गिनिज वर्ल्ड रेकर्ड कायम गरेका हुन् । सेप्टेम्बर २९ को साँझ ७ बजेर १५ मिनेटमा सुरु भएको आधा घण्टा लामो प्रस्तुतीमा ११ हजार २१२ जनाले एकैपटक प्रत्यक्ष लाइभ हेरेका थिए । डा मूर्तिको उक्त फेसबुक लाइभलाई ९ हजार जनाले शेयर गरेका थिए भने २० हजार लाइक र १८ हजार कमेन्ट आएको थिए । फेसबुक लाइभ प्रस्तुती सम्पन्न हुने बेला सम्म १ लाख ५० जनाले हेरेका थिए ।

डा मूर्ति यसरी स्वास्थ्य सचेतना जगाउन फेसबुक पेजमार्फत यति धेरै भ्युज पाउने र विश्व रेकर्ड कायम राख्ने पहिलो नेपाली डाक्टर त हुँदै हुन् । विश्वमा पनि पहिलो हुन सफल भएका छन् । उनले आफूले सर्वसाधारणलाई सचेत गराएर मुटुरोगको केही हदसम्म भार कम गर्न सहयोग गर्न सक्छु की भनेर सचेतना कार्यक्रम सुरु गरेको र अहिले आएर त्यही कामले विश्व रेकर्ड राखेको देख्दा निकै हर्षित भएको बताए । उनले यसको श्रेय सबै दर्शकलाई जाने समेत जनाए ।

यसैगरी यो मात्र होइन, डा मूर्तिले अर्को  विधामा पनि विश्व रेकर्ड बनाउन सफल भएका छन् । उनले सन् २०१३- १४ मा इमेज एफएम १०३ दशमलब ६ मेघाहर्जमा मुटुरोग र यसबाट बच्न अपनाउनुपर्ने उपायकाबारेमा लगातार ४४ हप्ता ४४ एपिसोडका गेस्ट डाक्टरका रुपमा कार्यक्रममा पुगेर आफनो ज्ञान शेयर गरेका थिए । यो विधामा पनि उनले विश्व रेकर्ड कायम गरेका छन् । यसमा उनलाई अन्तवार्ता लिने सञ्चारकर्मी शैलजा सिंह पनि यो विश्व रेकर्डमा समावेश भएकी छिन् ।

डा मूर्तिले विगत १२ वर्षदेखि मुटुरोगको रोकथामका लागि फेसबुक पेज मार्फत जनचेतनामूलक कार्यक्रम गर्दै आइरहेका छन् । उनका सूचनामूलक भिडियोलाई दर्शकले निकै मन पराउने गरेको पाइन्छ ।