काठमाडौं : शहीद धर्मभक्त राष्ट्रिय प्रत्यारोपण केन्द्रका नर्सहरू आन्दोलनमा उत्रिएपछि सेवा प्रभावित भएको छ। अस्पतालमा कार्यरत नर्सहरू पुराना कर्मचारीको ग्रेडिङ, स्थायी लगायतका ६ बुँदे माग राखी आन्दोलनमा उत्रिएका हुन्।

उनीहरूले आन्तरिक प्रतिस्पर्धाबाट स्थायी गराउनुपर्ने हाम्रो माग राखेका छन्। लोकसेवा आयाेगबाट खुला प्रतिस्पर्धाबाट स्थायी बनाउने प्रक्रिया मान्य नहुने उनीहरूको भनाइ छ।

अस्पतालका निर्देशक डा. पुकारचन्द्र श्रेष्ठले लामो समयको तयारीपछि यसपटक मन्त्रालयले दरबन्दी स्वीकृत गरी स्थायी पदपूर्तिका लागि लोकसेवालाई आग्रह गरेको प्रतिक्रिया दिए। अब एक दुई दिनमा विज्ञापन खुल्ने भएकाले आन्दोलन गर्नुपर्ने कारण नभएको उनको भनाइ छ।

अस्पतालमा भएको आन्दोलनका कारण बिरामीले पाउने सेवा प्रभावित भइरहेको छ। हाल अस्पतालमा दैनिक एक सयभन्दा बढीको मिर्गौला डायलासिस तथा हप्ताको ७ वटा मिर्गौला प्रत्यारोपण हुँदै आएको छ।

नर्सिङ कर्मचारीहरूले आन्दोलन गरे पनि आईसीयू, इमर्जेन्सी, ओटी तथा प्रत्यारोपण सेवा भने प्रभावित नभएको निर्देशक डा. श्रेष्ठले बताए। करिब ६ वर्षअघि स्थापित केन्द्रमा हाल ९६ जना नर्स कार्यरत छन्।