भिटामिन डीको कमी भएमा हाम्रो शरीरमा हड्डी बलियो बनाउने तत्वको नै निर्माण हुँदैन । यसका कारण हड्डी कमजोर हुँदै जान्छ ।
भिटामिन डीको कमी हुँदा बच्चाहरूको हाड सानो हुने, हातखुट्टा लुलो र बांगो हुने समस्या आउँछ। यसको कमीले क्रमशः शरीर नै कमजोर भएर जान्छ । कतिपय अवस्थामा भिटामिन डिको कमी भएको लक्षण ठ्याक्कै देखिँदैन।

यसको कमीले हड्डी तथा जोर्नी दुख्ने, मुटुमा समस्या देखिने, कठिन खालको दम आउने र क्यान्सरसम्म हुने खतरा हुन्छ। यसको कमीले डिप्रेसन, कपाल झर्ने, टाउको दुख्ने लगायत समस्या पनि निम्तिन सक्छ ।
भिटामिन डीले मधुमेह र रक्तचापलाई समेत सन्तुलित राख्ने भएकाले यसको कमीले मधुमेह र रक्तचापको समस्या समेत देखिन सक्छ ।

दूधबाट बनेका परिकार, जस्तै दही,पनिर,मही, ताेफु , माछा,मासु अण्डा नखाने र घाममा नबस्ने  मानिसलाई भिटामिन डीको कमी हुने विभिन्न तथ्यहरूले देखाएकाे छ ।  बिहानदेखि बेलुकीसम्म कोठाभित्रै बसेर काम गर्नेलाई पनि यस्तो समस्या हुन सक्छ । यसैगरी कालो वर्णका मानिस भिटामिन डीको बढी जोखिममा हुने देिखएकाे छ । अध्ययन अनुसार  कालो वर्णका मानिसमा हुने मिलानियन पिगमेन्ट नामक तत्त्वले भिटामिन डिको निर्माणमा अवरोध सृजना गर्छ ।

मृगौलासम्बन्धी समस्या भएका मानिसमा पनि भिटामिन डीको कमी हुन सक्छ । किनकी, मृगौलाले भिटामिन डिको निर्माणसँग प्रत्यक्ष सम्बन्ध हुन्छ । पाचन प्रणालीमा समस्या दीर्घरोगी, मोटोपन भएका मानिसमा पनि यसको समस्या देखिन सक्छ । दुध, दही सागपात, माछा, मासु,अण्डा प्रशस्त मात्रामा खानुपर्छ । साथै सबैभन्दा महत्वपूर्ण कुरा   दैनिक २० देखि ३० मिनेट घाममा बस्ने गर्नाले यो समस्याबाट बच्न सकिन्छ । घाम नै भिटामिन डीको मुख्य स्रोत हो । जुन निशुल्क पाइन्छ ।