हेल्थ टिभी अनलाइन : वरिष्ठ क्यान्सर रोग विशेषज्ञ डा प्रकाशराज न्यौपानेको क्यान्सर रोगबाटै मृत्यु भएको छ । ६४ वर्षका डा न्यौपानेको आज बिहान उपचारका क्रममा पाटन अस्पतालमा उनको निधन भएको हो ।

डा न्यौपाने विगत एक वर्षदेखि कोल्यान्जियो कार्सिनोमा नामक क्यान्सर रोगसँग संघर्ष गरिरहेको उनको उपचारमा संलग्न चिकित्सक डा अरुण शाहीले जानकारी दिएका छन् । सर्जिकल अन्कोलोजीमा पीएचडी समेत गरेका डा न्यौपाने नेपालका स्थापित क्यान्सर रोग विशेषज्ञ त थिए नै क्यान्सर रोग विरुद्धको अभियानका अभियन्ता समेत थिए ।

भक्तपुर क्यान्सर अस्पतालमा डाइरेक्टर समेत भइसकेका डा न्यौपाने हाल बीएण्डबी तथा काठमाडौं क्यान्सर सेन्टरमा कार्यरत थिए । धेरै क्यान्सर रोगका बिरामीलाई उपचार मार्फत नयाँ जीवन दिएका डा न्यौपानेको निधन क्यान्सर रोगबाटै भएको हुन पुगेको छ ।