हेल्थ टिभी अनलाइन :  नेपाल स्वास्थ्य अनुसन्धान परिषदले स्वास्थ्य तथा जनसंख्या वैज्ञानिकहरुको शिखर सम्मेलन यही चैत २८ देखि ३० गतेसम्म गर्ने भएको छ ।

एघारौं स्वास्थ्य तथा जनसंख्या वैज्ञानिकहरुको सम्मेलनकाबारेमा जानकारी दिन आयोजना गरिएको पत्रकार सम्मेलनमा बोल्दे परिषदका सदस्य सचिव डा प्रमोद जोशीले यसपटकको समेलनको नारा ‘स्वास्थ्य, जलवायु र जनसंख्यामा परिवर्तन : दिगो र समावेशी भविष्यको लागि उत्थानशील स्वास्थ्य प्रणाली’ रहेको जनाए ।

उनले सम्मेलनमा एक हजार भन्दा बढी राष्ट्रिय तथा भारत, चीन, युके, डेनमार्क, अमेरिका लगायतका सय बढी अन्तराष्ट्रिय अनुसन्धानकर्ता तथा वैज्ञानिकहरुको सहभागिता रहने जानकारी दिए । डा जोशीका अनुसार यस वर्षको सम्मेलन विशेषगरी जलवायु परिवर्तनका कारण स्वास्थ्य क्षेत्रमा भएका र हुनसक्ने सम्भावित चुनौतीहरु स्वास्थ्य प्रणालीको उत्थानशिलता र स्वास्थ्य सेवामा समान पहुँचको सुनिश्चतता जस्ता विषयमा केन्द्रित रहनेछ ।

सम्मेलनमा ८७ वटा मौखिक प्रस्तुतिकरण र ११५ वटा पोस्टर प्रस्तुतिकरण रहने छन्। यस सम्मेलनबाट प्राप्त निष्कर्षले प्रमाणमा आधारित नीति निर्माणको लागि पूर्वाधार बनाउँदै दिगो र उत्थानशिल स्वास्थ्य सेवाको सुनिश्ति गर्न उल्लेखनीय भूमिका खेल्ने छ भन्ने परिषदले विश्वास लिएको छ ।

सम्मेलनको उद्घाटन बिहिबार बिहान शिक्षा विज्ञान तथा प्रविधि मन्त्री विद्या भट्टराईले गर्ने कार्यक्रम रहेको छ ।