हेल्थ टिभी अनलाइन : सुर्तीजन्य पदार्थ नियन्त्रण तथा नियमन गर्ने ऐन विपरित सूर्य टोबाकोको मुख्य प्रायोजनमा साहित्य सम्मेलन हुन थालेपछि स्वास्थ्य तथा जनसंख्या मन्त्रालयले त्यसलाई रोक्नका लागि पत्र सम्बन्धित निकायलाई पठाएको छ ।

मन्त्रालय अन्तर्गतको स्वास्थ्य कर कोषको सचिवालयका सदस्य सचिव गोपीकृष्ण रेग्मीले आवश्यक कारवाहीका सम्बन्धमा भन्दै उक्त पत्र कार्यक्रम हुने स्थान ललितमहानगर र जिल्ला प्रशासन कार्यालय ललितपुरलाई पठाएका हुन् । मन्त्रालयले पठाएको पत्रमा लेखिएको छ, सुर्तीजन्य पदार्थ उत्पादक कम्पनी, सूर्य नेपाल मुख्य प्रायोजक र आयोजक भई यही भदौ २२ र २३ गते ललितपुरको होटल हिमालयमा सूर्य नेपाल काठमाडौं कालिंग लिटरेरी फेस्टिबल आयोजना गरिएको भन्ने व्यहोराको समाचार विभिन्न सञ्चारमाध्यममा आएको सन्दर्भमा लेखिंदैछ । उक्त ऐनको दफा १० मा सुर्तीजन्य पदार्थको उत्पादक लगायत कसैले पनि विज्ञापन तथा कार्यक्रम प्रायोजन गर्न नपाइने स्पष्ट रुपमा व्यवस्था गरेको पनि पत्रमा उल्लेख छ ।

स्वास्थ्यले पठाएको पत्रमा चुरोट कम्पनीको मुख्य प्रायोजनमा हुन लागेको कार्यक्रमलाई आवश्यक कारवाही गर्ने जिम्मा कानूनले सम्बन्धित जिल्लाको सहायक प्रमुख जिल्ला अधिकारी र स्थानीय तहको प्रमुख प्रशासकीय अधिकृतलाई दिएकाले यसबारे बुझेर आवश्यक कारवाही गर्नका लागि आग्रह गरिएको छ । कार्यक्रम ललितपुरमा हुन लागेकाले स्वास्थ्य मन्त्रालयले उक्त पत्र ललितपुरको जिल्ला प्रशासन कार्यालय र ललितपुर महानगरलाई पठाएको हो । ऐन अनुसार अनुगमन गर्ने र आवश्यक कार्वाही गर्ने अधिकार दुवै निकायसँग भएकाले उक्त पत्र दुईतिर नै पठाइएको हो । सुर्तीजन्य पदार्थ नियन्त्रण सम्बन्धी ऐनको दफा २७ ले यस ऐन अन्तर्गतको मुद्धाको कारवाही र किनारा सम्बन्धित जिल्लााको प्रमुख जिल्ला अधिकारीले गर्नेछ भन्ने व्यवस्था गरेको छ ।

नेपालमा सुर्तीजन्य पदार्थको सेवनकै कारण वर्षेनी ३७ हजारभन्दा बढी मानिसले ज्यान गुमाउने गरेका छन् । धेरैको ज्यान लिने भएकाले विश्वभर नै उत्पादन अनुमति पाए पनि चुरोट कम्पनीलाई अपराधी उद्योगका रुपमा चित्रण गरिन्छ । त्यसैले यसको विज्ञापन तथा प्रायोजनमा रोक लगाएर यसको सेवनमा कमी ल्याउने नीति संसारभर प्रचलित छ ।