हेल्थ टिभी अनलाइन \काठमाडौं :  स्वास्थ्य तथा जनसंख्या वैज्ञानिकहरुको नवौं राष्ट्रिय शिखर सम्मेलन काठमाडौंमा आजदेखि सुरु भएको छ ।

नेपाल स्वास्थ्य अनुसन्धान परिषद्ले आयोजना गरेको उक्त नवौं शिखर सम्मेलनको उद्घाटन राष्ट्रिय योजना आयोगका उपाध्यक्ष डा मिन बहादुर श्रेष्ठले गरेका थिए । सम्मेलनको उद्घाटन गर्दै श्रेष्ठले अनुसन्धान बिना देश विकासको कल्पना समेत गर्न नसकिने कुरा जिकीर गर्दै सरकाले यसमा लगानी बढाउनपर्नेमा जोड दिएका थिए । उनले अनुसन्धानबाटै आएका निचोडबाट देशको नीति तथा योजना बनाइने हुँदा अनुसन्धान असाध्यै आवश्यक रहेको र यसमा राज्यले लगानी र प्राथमिकता दुबै बढाउनेमा आफू विश्वस्त रहेको जनाएका थिए ।

सम्मेलनको उद्घाटन सत्रमा बोल्दै परिषद्का सदस्य सचिव डा प्रदिप ज्ञवालीले परिषद्ले आफनो स्थापना दिवसको दिन पारेर प्रत्येक वर्ष स्वास्थ्य तथा जनसंख्या वैज्ञानिकहरुको सम्मेलन गर्दै आएको र यसको मुख्य उद्धेस्य अनुसन्धानको महत्वकाबारेमा जानकारी दिने र अनुसन्धानकर्ताको हौसला बढाउनु रहेको भएको जिकीर गरे ।

आजबाट सुरु भएको सम्मेलन भोलिसम्म चल्नेछ । सम्मेलनमा विभिन्न विषयहरुमा १५० बढी पेपरहरु प्रस्तुत हुनेछन्। सम्मेलनमा भाग लिनका लागि युके, स्विजरल्यान्ड, जर्मन, भारत लगायतका विभिन्न देशहरुबाट वैज्ञानिक तथा अनुसन्धानकर्ताहरु काठमाडौं आएका छन्।