सधैँजसो फोहोर तथा अस्तव्यस्त रहने मुलुककै जेठो अर्थात् पुरानो वीर अस्पतालको मुहार फेरिएको छ । सरसफाइ अभियान चलाइएपछि वीर अस्पतालको मुहार फेरिएको हो । अभियानको एक महिना बिते पनि सरसफाइ पूर्णरूपले सकिएको छैन ।

स्वास्थ्य राज्यमन्त्री पद्मा अर्यालको उपस्थितिमा वीर अस्पतालको सफाइ अभियान सुरु गरिएको थियो । हास्य कलाकार सीताराम कट्टेल ‘धुर्मुस’ र कुञ्जना घिमिरे ‘सुन्तली’ को नेतृत्वमा रंगरोगनको काम पनि गरिएको थियो । अस्पताल सफाइ अभियानमा आवश्यक सामग्रीहरुको व्यवस्था भने अस्पतालले मिलाएको थियो ।

आजभोलि अस्पतालको ट्वाइलेटको दुर्गन्ध हराएको छ भने दिसापिसाब गर्ने प्यान, कमोडहरु टिलिक्क टल्किएका छन् । नाक थुन्दै भित्र पस्नुपर्ने अवस्थाको अन्त्य भएको छ भने अस्पतालका झ्याल तथा भित्ताहरु पहेँलो र निलो रंगले पोतिएका छन् । भित्ताहरुमा असरल्ल फैलिएको तार ‘लिस्टी’ले बाँधिएको छ । त्यसैगरी प्रत्येक विभाग, इमरजेन्सी, स्टोर रुमदेखि अस्पतालको कुनाकाप्चा पनि रंगिन देखिन थालेका छन् । यससँगै अस्पतालमा आउने बिरामीका लागि बस्ने व्यवस्थासमेत मिलाइएको छ ।

यसअघि वीर अस्पताल फोहोर भएको टिकाटिप्पणी भइरहने गर्थ्याे। आजभोलि अस्पतालको प्रशंसा गर्न थालेका छन् । अस्पतालको यो रूपलाई कायम राख्ने दाबी अस्पतालले गरेको छ । लामो समयदेखि फोहोर तथा अस्तव्यस्त रहेको वीर अस्पताल सरसफाइले मुलुकलाई नै नयाँ सन्देश दिएको छ । अस्पतालको सहयोगमा धुर्मुस सुन्तली फाउण्डेशनले सफाइ गरेको थियो । फाउण्डेशनलाई खेम्स क्लिनिङ, वागमती सफाइ अभियानका अभियन्ता, टेलिसिरियल भद्रगोलको टिम, सिस्नोपानी समूह, महजोडी लगायतले सघाउँदै आएका छन् ।

अभियानका लागि अस्पतालको तर्फबाट १० कर्मचारी तथा अभियन्ताका तर्फबाट १५ स्वयंसेवी गरी जम्मा २५ जनाको समूहलाई चार समूहमा विभाजन गरिएको थियो । त्यसमा अन्य स्वयंसेवीहरुले पनि बेलाबेलामा सघाउँदै आएका छन् ।

१२९ वर्षको इतिहास

गरिब तथा जनतामुखी अस्पतालको रूपमा परिचित यो अस्पताल काठमाडौंको खुल्लामञ्च अगाडि अवस्थित छ । वि.सं. १९४६ साउनमा वीरशमशेरले स्थापना गरेका हुनाले अस्पतालको नाम वीर राखिएको हो । यो अस्पताल सन् २००३ पश्चात् सरकारी एजेन्सी चिकित्सा विज्ञान राष्ट्रिय प्रतिष्ठानमार्फत सञ्चालन भइरहेको छ ।

अस्पतालले देशभरका सबै तह र तप्काका व्यक्तिहरूका सस्तो र सर्भसुलभ सेवा प्रदान गर्दै आएको छ । ग्रामीण भेगका धेरै बिरामीहरू अस्पतालमा निःशुल्क सेवा लिन आउने गरेका छन् । हाल अस्पतालमा ४५८ शय्या क्षमताको छ । देशकै प्रसिद्ध डाक्टरहरूमध्ये केही यो अस्पतालमा कार्यरत छन् ।