नेपालगञ्ज : नेपालगञ्ज उपमहानगरपालिकाअन्तर्गत सञ्चालित अधिकांश सामुदायिक विद्यालयमा अध्ययन गर्ने छात्रा महिनावारीको समयमा विद्यालय जाँदैनन्।  विद्यालयमा छात्रामैत्री शौचालय नहुनु र सरसफाइका लागि पानी अभाव हुने गरेका कारण छात्रा चाहेर पनि विद्यालय जान नसकेका हुन्।

चाहेर पनि विद्यालय जान नसक्ने बाध्यताका कारण उनीहरूको अध्ययन प्रभावित हुने गर्छ भने मानसिक पीडाले पनि छात्रालाई पिरोल्छ। ‘विद्यालयको शौचालय अत्यन्त फोहाेर छ, प्याड फाल्ने स्थान र सरसफाइका लागि पानी अभाव हुने भएकाले महीनावारी भएका बेला चाहेर पनि विद्यालय जान सकिँदैन’, कक्षा १० मा अध्ययनरत छात्रा श्वेता कनौजियाले भनिन्।

विशेषगरी कक्षा ६ देखि १० सम्मका छात्रालाई सेनेटरी प्याड र छात्रामैत्री शौचालय विद्यालयमा नहुँदा उनीहरुको पठनपाठन प्रभावित हुने गरेको शिक्षिका मोहिनी योगीले बताइन्।

नेपालगञ्ज उपमहानगरपालिकामा ४३ सामुदायिक विद्यालयमा पाँच हजार ७७६ छात्रा अध्ययन गर्छन्। यहाँका केही सामुदायिक विद्यालयमा अहिले छात्रामैत्री शौचालय निर्माण भइरहेका छन् तर, अझै थुप्रै विद्यालयमा छात्रामैत्री शौचालय छैनन्।