चार वर्षयता पहिलोपटक कार्बन उत्सर्जन बढेको तथ्यांक सार्वजनिक भएको छ । विवरण प्राप्त भएपछि संयुक्त राष्ट्रसंघले जलवायु परिवर्तनसँग लड्न गरिएका प्रयास विफल भएकाे  बताएको छ ।

राष्ट्रसंघअन्तर्गतको यूएन इन्भारोमेन्टले प्रकाशित गरेको ‘इमिसन ग्याप’ रिपोर्टअनुसार, सन् २०१७ मा कार्वनडाइअक्साइड उत्सर्जनको मात्रा बढ्नुमा आर्थिक वृद्धिदरको मुख्य दोष रहेको छ,  जसकारण देशको कार्बन उत्सर्जन घटाउने प्रयासहरू कमजोर भएका छन्।

रिपोर्टले पेरिस जलवायु सन्धिले लिएको सन् २०३० सम्ममा कार्वन उत्सर्जनको मात्रा घटाइ तापक्रम वृद्धिदरलाई सुरक्षित सीमामा राख्ने लक्ष्य भेट्टाउन गाह्रो हुने विश्लेषण गरेको छ। रिपोर्टअनुसार, सन् २०२० सम्म विश्वव्यापीरूपमा उत्सर्जन अझै बढ्नेछ।

पोल्याण्डमा २ देखि १४ डिसेम्बरसम्म चल्ने संयुक्त राष्ट्रसंघको जलवायु सम्मेलन सुरु हुनभन्दा केही दिनअघि यस्तो रिपोर्ट आएको हो। संयुक्त राष्टसंघको यूएन इन्भारोमेन्टले पछिल्ला ९ वर्षसम्म वर्तमान र भविष्यमा हुने हरितगृह ग्यास उत्सर्जनको अनुमान गरिएका पछिल्ला वैज्ञानिक अध्ययननहको विश्लेषण गरेको थियो।