हेल्थ टिभी अनलाइन \काठमाडौं : चीन सरकारले अनुदानमा दिएको कोरोना विरुद्धको भेरोसेल खोप देशभरका ६० देखि ६४ वर्ष उमेर समूहका नागरिकलाई आगामी जेठ २५ गतेदेखि दिइने भएको छ ।

स्वास्थ्य तथा जनसंख्या मन्त्रालयका अनुसार चीन सरकारले दिएको ‘भेरोसेल’ खोप ६० देखि ६४ वर्षका नागरिकलाई दिइने भएको हो । यो अभियान देशभर यही जेठ २५ गतेदेखि शुरु हुने मन्त्रालयले जनाएको छ ।

मन्त्रालयले खोप लगाउन जाँदा नागरिकता वा कुनै पनि सरकारी कागजात वा वडा कार्यालयले दिएको सिफारिस पत्र अनिवार्य साथमा लिएर जान आग्रह गरेको छ ।

चीनबाट आजै मात्र ८ लाख डोज खोप आइसकेको छ । यसैगरी तीब्बतले दिने २ लाख डोज खोपमध्ये आज ५० हजार डोज आएको छ भने बाँकी खोप भोलि नै आइपुग्ने पनि मन्त्रालयले जनाएको छ ।

नेपाललाई खोप सहयोग गर्नका लागि राष्ट्रपति विद्यादेवी भण्डारीले चिनियाँ राष्ट्रपति सी जिनपिङसँग टेलिफोन संवाद गरेकी थिइन् । त्यसलगत्तै चिनिया राष्ट्रपति सी ले १० लाख डोज खोप सहयोग गर्ने घोषणा गरेका थिए । त्यही प्रतिवद्धता अनुसार आज ८ लाख ५० हजार खोप नेपाल आइसकेको छ ।