हेल्थ टिभी अनलाइन :  भारतमा यतिबेला कोरोनाको दोस्रो लहर तीब्र गतिमा फैलिरहेको छ ।

गत २४ घण्टामा मात्रै त्यहाँ ८१ हजार भन्दा बढी कोरोनाका नयाँ संक्रमित थपिएका छन्। भारतीय स्वास्थ्य मन्त्रालयका अनुसार ६ महिनापछि त्यहाँ यति ठूलो संख्यामा एकैपटक संक्रमित देखिएका हुन्। यसभन्दा अघि अक्टोबरमा एकैदिन ८१ हजार ४८४ जनामा कोरोना संक्रमण पुष्टि भएको थियो । उता गत २४ घण्टामा ४६९ जनाको कोरोना संक्रमणकै कारण मृत्यु भएको जनाइएको छ । अहिले भारतको ५ वटा राज्य बढी प्रभावित भएका छन्।

महाराष्ट्र,कर्नाटक, केरल, छत्तीसगढ़ र पंजाबमा कुल संक्रमितमध्ये ७८ प्रतिशत संक्रमित रहेको त्यहाँको स्वास्थ्य मन्त्रालयले जनाएको छ । यी राज्यमा पनि महाराष्ट्र बढी प्रभावित बनेको छ ।

भारतमा हालसम्म १ करोड २३ लाख ३ हजार १३१ जनामा कोरोना पुष्टि भइसकेको छ भने १ लाख ६३ हजार ३९६ जनाको मृत्यु भइसकेको छ ।