हेल्थ टिभी अनलाइन : भारतमा कोरोना विरुद्धको दुबै डोज खाेप लगाइसकेका स्वास्थ्यकर्मीमा पनि पुन: कोरोना संक्रमण पुष्टि भएको छ ।

दिल्लीको एक अस्पतालमा काम गर्ने नर्समा कोरोना विरुद्धको दुबै डोज लिइसकेपछि कोरोना संक्रमण देखिएको अस्पतालले जनाएको छ । नर्सले पहिलो डोज जनवरी १८ मा र दोस्रो डोज फेब्रुअरी १७ मा लगाएकी थिइन्। उनलाई सोमबार अस्पतालमा ड्युटीमै रहेका बेला शरीर दुख्ने र ज्वरो आएपछि शंका लागेर परीक्षण गर्दा कोरोना पोजेटिभ आएको बताइएको छ । उनी अहिले आइसोलेसनमा रहेकी छिन्।

उता भारतकै उत्तर प्रदेशको लखनउमा पनि कोरोनाको दुबै डोज खोप लगाइसकेको एक चिकित्सकमा कोरोना पोजेटिभ देखिएको छ । यी दुबै घटनाले कोरोना विरुद्धको खोप लगाए पनि पूर्ण रुपमा सुरक्षित हुन सकिंदैन र यसबाट बच्न जनस्वास्थ्यका मापदण्ड पालना गर्नुको विकल्प नभएको प्रष्ट पारेको छ ।

नेपालमा दोस्रो डोज खोप दिन अझै शुरु गरिएको छैन्। वैशाख ७ गतेदेखि मात्र पहिलो चरणमा पहिलो डोज पाएकाहरुले दोस्रो डोज खोप लगाउने कार्यक्रम तय भएको छ ।