हेल्थ टिभी अनलाइन \काठमाडौं : नेपालमा पहिलो चरणको कोरोना विरुद्धको खोप अभियान माघ २४ गते शनिबारसम्म चल्ने भएको छ ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार माघ १४ देखि शुरु भएको कोरोना विरुद्धको खोप यही शनिबारसम्म चल्नेछ । भारत सरकारले अनुदानमा दिएको १० लाख डोज कोरोना खोप सरकारले पहिलो चरणमा कोरोना विरुद्धको लडाइमा फ्रन्टलाइनमा रहेका स्वास्थ्यकर्मी एवं कर्मचारीलाई दिने निर्णय गरेको थियो । योसँगै सरकारले कारागारमा रहेका कैदीबन्दी एवं वृद्धाआश्रममा रहेका जेष्ठ नागरिकलाई समेत यो खोप प्रदान गरिएको छ ।

कोरोना विरुद्धको खोप लिनका लागि मापदण्ड अनुसार नाम दर्ता गराएका समूहलाई मात्र खोप दिइएकोमा आज स्वास्थ्य मन्त्रालयले यसलाई केही परिमार्जन गर्दै परिचय पत्रको आधारमा पनि स्वास्थ्यकर्मीलाई खोप दिने जनाएको छ । मन्त्रालयले नाम दर्ता गर्न छुटेका स्वास्थ्यकर्मीले नेपाल मेडिकल काउन्सिल, नेपाल नर्सिङ काउन्सिल, नेपाल स्वास्थ्य व्यवसायी परिषद, नेपाल फार्मेसी काउन्सिलको दर्ता प्रमाण पत्र र फोटोसहितको परिचय पत्र लिएर सम्बन्धित खोप केन्द्रमा गएर खोप लगाउन सकिने जनाएको हो ।