हेल्थ टिभी अनलाइन \काठमाडौं : माघ १४ गतेदेखि शुरु भएको कोरोना भाइरस विरुद्धको खोप अभियानको सातौँ दिनसम्म आइपुग्दा देशभर १ लाख २८ हजारभन्दा बढीले खोप लगाइसकेका छन्। स्वास्थ्य तथा जनसंख्या मन्त्रालयका अनुसार ७७ जिल्लाका २०१ खोप केन्द्रबाट मंगलबारसम्म १ लाख २८ हजार ६५० जनाले खोप लगाएका हुन्।

जसमध्ये प्रदेश १ मा १७ हजार २८७, प्रदेश २ मा १६ हजार १७३, बाग्मती प्रदेशमा ४५ हजार ३४५, गण्डकी प्रदेशमा १६ हजार २७० जनाले कोरोना विरुद्धको खोप लिएका हुन्।

यसैगरी लुम्बिनी प्रदेशमा १७ हजार ९७९ जना, कर्णाली प्रदेशमा ६ हजार ६६० र सुदूरपश्चिममा ८ हजार ९३६ जनाले खोप लिइसकेको मन्त्रालयका प्रवक्ता डा जागेश्वर गौतमले जनाएका छन्।

सरकारले पहिलो चरणमा कोरोना विरुद्धको फ्रन्टलाइनमा खटिने ४ लाख ३० हजार जनालाई कोरोना विरुद्धको खापे दिने लक्ष्यका साथ माघ १४ देखि खोप अभियान शुरु गरेको हो ।