हेल्थ टिभी अनलाइन \काठमाडौं : नेपाल स्वास्थ्य अनुसन्धान परिषदले सातैवटा प्रदेशमा आफनो शाखा कार्यालय खोल्ने भएको छ ।

स्वास्थ्यको अनुसन्धानलाई बिस्तार गर्दै लाने क्रममा यो आर्थिक वर्षदेखि शाखा कार्यालय (एकाई कार्यालय) खोल्न लागिएको परिषदका कार्यकारी प्रमुख डा प्रदिप ज्ञवालीले बताए ।

उनले भने, ‘सातैवटा प्रदेशमा यसपटकदेखि एकाई कार्यालय खोल्नका लागि एक करोड बजेट समेत छुट्याइसकिएको छ । अब प्रदेश सरकारसँग छलफल गर्दै काम अघि बढाइरहेका छौं ।’ उनले शुरुमा प्रत्येक प्रदेशमा ३ जना स्टाफ रहने पनि बताए ।

प्रदेशमा परिषदको कार्यालय हुँदा त्यही भएका स्थानीय रोग, समस्या वा कुनै पनि विषयको स्थानीय स्तरमै रहेर अनुसन्धान हुने हुँदा यसले देशका कुना काप्चाका विषयहरु समेटिने र अनुसन्धानको क्षेत्र फराकिलो हुने समेत जिकीर गरे । उनले कतिपय प्रदेशमा जग्गा समेत उपलब्ध भइसकेको भन्दै अब परिषदको क्षेत्र फराकिलो बन्दै जाने जानकारी दिए ।