हेल्थ टिभी अनलाइन \बाँके : बाँकेको भेरी अस्पतालमा उपचाररत थप एक जना कोरोना संक्रमितको मृत्यु भएको छ । जिल्ला कोभिड १९ संकट व्यवस्थापन केन्द्रका अनुसार बर्दिया गेरुवा ५ का ७२ वर्षीय पुरुषको कोरोना संक्रमणबाट आज बिहान मृत्यु भएको हो ।

उनमा मंसीर १४ गते कोरोना संक्रमण पुष्टि भएको थियो । रिपोर्ट पोजेटिभ आएपछि अस्पतालमा भर्ना गरेर उपचार गरिएको भए पनि स्वास्थ्यमा सुधार नआएपछि आइसीयूमा राखेर उपचार गरिएको अस्पतालले जनाएको छ ।

अवस्था बिग्रदै गएपछि रेम्डिसिभिर पनि चलाइएको भए पनि उनको उपचारकै क्रममा आज बिहान मृत्यु भएको हो । योसँगै बाँके जिल्लामा बाहिरी जिल्लाबाट उपचारका लागि आएर मृत्यु हुने संक्रमितको संख्या ६४ पुगेको छ ।

स्वास्थ्य तथा जनसंख्या मन्त्रालयका अनुसार आइतबारसम्म नेपालमा १५ सय ९४ जनाको कोरोना संक्रमणबाट मृत्यु भइसकेको छ ।