हेल्थ टिभी अनलाइन \काठमाडौं : नेपालमा आज थप १४९० जनामा कोरोना भाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभर थप १४९० जनामा कोरोना संक्रमण पुष्टि भएको हो । योसँगै नेपालमा कुल कोरोना संक्रमितको संख्या २ लाख ३६ हजार २४६ पुगेको छ । यी मध्ये हालसम्म २ लाख १८ हजार १६१ जना कोरोना संक्रमित निको भएर घर फर्किसकेका छन्।

मन्त्रालयका अनुसार आजै मात्र देशभर १५६७ जना संक्रमित निको भएका छन्। यसैगरी पछिल्लो २४ घण्टामा थप ९ जना कोरोना संक्रमितको मृत्यु भएको छ । योसँगै देशभर कोरोना संक्रमणबाट मृत्यु हुनेको संख्या १५ सय ३८ पुगेको छ ।

उता अहिले पनि देशभर ६०५ जना कोरोनाको आशंकामा क्वारेन्टाइनमा रहेका छन्। आज सक्रिय संक्रमितको संख्या १६ हजार ५४७ रहेको छ ।