हेल्थ टिभी अनलाइन \बाँके : बाँकेमा उपचाररत ५ दिनकी सुत्केरीको कोरोना संक्रमणका कारण मृत्यु भएको छ ।

तुलसीपुर उप महानगरपालिका १० दाङ निवासी २० वर्षीया सुत्केरीको कोरोना संक्रमणका कारण बाँकेको नेपालगंज मेडिकल कलेज कोहलपुरमा आज मृत्यु भएको हो । जिल्ला कोभिड -१९ संकट व्यवस्थापन केन्द्र बाँकेका अनुसार कार्तिक १६ गते सुत्केरी व्यथा लागेर दाङबाट नेपालगंज मेडिकल कलेज कोहलपुरमा ल्याइएकोमा १७ गते उनले बच्चा जन्माएकी थिइन्।

बच्चा जन्माएपछि श्वासप्रश्वासमा समस्या आएपछि कोरोनाको आशंकामा उनको पीसीआर परीक्षण गरिएकोमा १८ गते रिपोर्ट पोजेटिभ आएको बाँकेका कोरोना फोकल पर्सन नरेश श्रेष्ठले जनाएका छन्। कोरोना संक्रमण पुष्टि भएपछि कोभिड आइसीयूमा राखेर उपचार भइरहेकोमा उनको आज दिउँसो ३ :२० बजे उपचारको क्रममा मृत्यु भएको हो ।

योसँगै उपचारका लागि बाहिरी जिल्लाबाट बाँके आएर ज्यान गुमाउने संक्रमितहरुको संख्या २५ पुगेको छ ।

यसभन्दा अघि पनि धुलिखेल अस्पतालमा सिन्धुपाल्चोक बाह्रबिसे–९ की २९ वर्षीया सुत्केरीको कोरोना संक्रमणबाट मृत्यु भएको थियो ।