हेल्थ टिभी अनलाइन\ काठमाडौं : विश्वभर कोरोना संक्रमितको संख्या २ करोड नजिक पुगेको छ । वर्ल्डोमिटरका अनुसार शनिबार बिहानसम्म विश्वमा कोरोना संक्रमितको संख्या १ करोड ९५ लाख ४२ हजार ६२६ पुगेको छ । यसैगरी हालसम्म ७ लाख २४ हजार ७५ जनाले ज्यान गुमाइसकेका छन्।

गत २४ घण्टामा मात्रै २ लाख ७४ हजार नयाँ संक्रमित थपिएका छन् भने ६ हजार २१५ जनाको कोरोनाबाट मृत्यु भएको छ । वर्ल्डोमिटरका अनुसार १ करोड २५ लाख संक्रमित कोरोना जितेर डिस्चार्ज भएका छन्। विश्वमा अहिले पनि ६२ लाख ६७ हजार भन्दा बडी सक्रिय संक्रमित रहेको बताइएको छ । हालसम्म कोरोनाबाट सबैभन्दा बढी प्रभावित अमेरिका बन्न पुगेको छ । अमेरिकामा मात्रै झण्डै ५१ लाख मानिसमा संक्रमण पुष्टि भएको छ भने १ लाख ६४ हजार बढीले ज्यान गुमाएका छन्।

अमेरिकापछि ब्राजिल र भारत प्रभावित भएको पाइएको छ । ब्राजिलमा हालसम्म २९ लाख ६७ हजार मानिसमा संक्रमण देखिएको छ भने झण्डै १ लाख मानिसले ज्यान गुमाएका छन्। यसैगरी भारतमा २० लाख ८६ हजार भन्दा बढीमा संक्रमण पुष्टि भएको छ भने ४२ हजार ५७८ जनालको कोरोनाबाट मृत्यु भएको जनाइएको छ । उता नेपालमा पनि संक्रमितको संख्या बढ्दो छ । हालसम्म नेपालमा २२ हजार बढीमा संक्रमण देखिएको छ भने ७० जनाले ज्यान गुमाएका छन्।