हेल्थ टिभी अनलाइन \काठमाडौं : टेकुस्थित राष्ट्रिय जनस्वास्थ्य प्रयोगशालाले पीसीआर परीक्षणको अनुमति पाएका प्रयोगशालाहरुले घरमा गएर स्वाब संकलन गर्न नपाउने बताएको छ ।

प्रयोगशालाले सूचना जारी गर्दै कोरोना छ छैन् भन्ने पत्ता लगाउन चाहने सबै जनाले अनिवार्य तोकिएको स्वास्थ्य संस्थामा नै गएर स्वाब दिन पर्ने जनाएको हो । सूचनामा घरमा गएर स्वाब संकलन नगर्न र नगराउनुहुन निजी प्रयोगशालाहरुलाई अनुरोध गरिएको छ ।

यसैगरी केही दिन यता केही स्वास्थ्य संस्थामा पीसीआर परीक्षणका लागि सरकारले तोकेको ५ हजार ५ सय रुपैयाँ भन्दा बढी रकम लिएको सूचना आएको भन्दै प्रयोगशालाले सरकारले तोकेको भन्दा बढी रकम नदिन सर्वसाधारणलाई अपिल गरेको छ । तर स्वाब संकलन गर्ने मात्र अनुमति पाएका स्वास्थ्य संस्थाको हकमा भने सेवा शुल्क बापत लाग्ने खर्चको १० प्रतिशत थप रकम लिन पाइने पनि सूचनामा जनाइएको छ ।

यदि कसैले तोकेको भन्दा बढी रकम लिएको पाएमा तुरुन्त जनस्वास्थ्य प्रयोगशालामा जानकारी गराउन पनि सर्वसाधारणलाई आग्रह गरिएको छ ।