हेल्थ टिभी अनलाइन : नेपाल औषधि उत्पादक संघको आयोजनामा आगामी फागुन २८ देखि काठमाडौंको भृकुटीमण्डपमा ’नेपाल फर्मा एक्स्पो २०२६’ को दशौं संस्करण आयोजना हुने भएको छ । “फर्मामा नवीनताः भोलिको स्वास्थ्यका लागि” भन्ने मूल नाराका साथ आयोजना हुन लागेको यस तीन दिने एक्सपोले नेपाली औषधि क्षेत्रको आधुनिक रूपान्तरणलाई उजागर गर्ने लक्ष्य राखेको छ ।

एक्स्पोकोबारेमा जानकारी दिन आज काठमाडौंमा आयोजित पत्रकार सम्मेलनका क्रममा नेपाल औषधि उत्पादक संघका अध्यक्ष विप्लव अधिकारीले हिजोका दिनमा गरेका अनुसन्धान र आविष्कारहरू आजको औषधि उद्योगको आधार हुन भन्दै आजको हाम्रो नवीन सोच र प्रविधिमा गरिने लगानीले नै भोलिको स्वस्थ नेपालको भविष्य सुनिश्चित गर्ने बताए । उनले यो एक्स्पो केवल प्रदर्शनी मात्र नभई नेपाललाई औषधि उत्पादनमा आत्मनिर्भर बनाउने एउटा बलियो खुड्किलो भएको समेत जिकीर गरे । उनले नेपाली बजारमा के कस्ता औषधि उत्पादन भइरहेका छन् भन्ने जानकारी लिन एक्स्पोले महत्वपूर्ण भूमिका खेल्ने बताए ।

संघका महासचिव तथा एक्स्पो संयोजक सन्तोष बरालले यस पटकको एक्स्पोमा २०० भन्दा बढी स्टलहरू रहने जानकारी दिए । जसमा औषधि उत्पादनमा प्रयोग हुने अत्याधुनिक प्रविधि, ल्याब टेक्नोलोजी, कच्चा पदार्थ, प्याकिङ्ग उत्पादक र मेसिनरीहरूको प्रदर्शन गरिनेछ । यस एक्स्पोमा ९० प्रतिशतभन्दा बढी सहभागिता विदेशी तथा बहुराष्ट्रिय कम्पनीहरूको रहने पनि उनले जानकारी दिए । जसले कच्चा पदार्थ, प्याकिङ सामग्री र नयाँ प्रविधिको क्षेत्रमा विश्वबजारमा आएका नवीनतम प्रविधिलाई नेपाली बजारसँग जोड्नेछन् । बाँकी १० प्रतिशत स्टलहरूमा स्वदेशी औषधि उद्योगका उत्कृष्ट उत्पादनहरू प्रदर्शन गरिनेछ उनले भने ।

बरालले भने, ‘नेपालमा अन्तर्राष्ट्रिय स्तरको गुणस्तरीय औषधि बन्छ भन्ने थाहा छैन । यस एक्स्पोमार्फत हामी सरोकारवाला र आम सर्वसाधारणलाई नेपालमै विश्वस्तरीय औषधि उत्पादन हुन्छ भन्ने विश्वास दिलाउन चाहन्छौँ । औषधि क्षेत्रको ज्ञान लिन चाहने जो कोहीका लागि प्रवेश नि : शुल्क गरिएको छ ताकि सबैले नेपाली औषधिको क्षमता र सामथ्र्य बुझ्दै नेपालमै गुणस्तरीय औषधि उत्पादन भइरहेको विषयमा जानकारी पाउनुहुनेछ ।

यस पटकको एक्स्पोलाई संघले एउटा उत्सवका रूपमा मनाउँदै विभिन्न पूर्व–कार्यक्रमहरू समेत सञ्चालन गरिरहेको छ। पहिलो कार्यक्रम अन्तर्गत माघ २ र ३ गते १६ वटा उद्योगको सहभागितामा फुटसल प्रतियोगिता सफलतापूर्वक सम्पन्न भइसकेको छ। खेलकुदलाई निरन्तरता दिँदै आगामी फागुन ८ र ९ गते ८ वटा उद्योगहरूको सहभागितामा ’क्रिकसल’ प्रतियोगिता आयोजना गरिनेछ। खेलकुदसँगै शैक्षिक र व्यावसायिक विकासका लागि फागुन ४ र ५ गते नै १०० जना म्यानेजरहरू र बजारमा कार्यरत १०० जना औषधि बजार प्रतिनिधिहरूका लागि विशेष तालिम तथा सेमिनार पनि  सञ्चालन गरिने जनाइएकाे छ ।