हेल्थ टिभी अनलाइन : स्वास्थ्य तथा जनसंख्या मन्त्रालयले छिमेकी राष्ट्र भारतमा निपाह भाइरस पुष्टि भएको र नेपालमा पनि यसको जोखिम रहेकाले शंकास्पद लक्षण देखिएमा तुरुन्त स्वास्थ्य संस्थामा सम्पर्क गर्न आग्रह गरेको छ । हालसम्म यसको खोप वा विशेष औषधि नभएकाले रोकथामका उपाय अपनाउनु नै यसबाट बच्ने उत्तम उपाय भन्दै सबैलाई सतर्क रहन मन्त्रालयले आग्रह गरेको हो ।

के हो निपाह भाइरस ? कसरी बच्ने ?

निपाह भाइरस जनावरबाट जनावर, जनावरबाट मानिस र मानिसबाट मानिसमा सर्ने एक किसिमको गम्भीर प्रकृतिको भाइरसको संक्रमण हो । यो भाइरस प्राकृतिक रुपमा फ्रुट ब्याट भनिने चमेरोमा पाइने गर्छ । निपाह भाइरसका लक्षणहरु ज्वरो आउने, टाउको दुख्ने, रिंगटा लाग्ने, मांसपेशी दुख्ने, वाकवाकी लाग्ने, श्वासप्रश्वासमा समस्या हुने, साथै टन्सिलाइटिस हुने हुन्छ । संक्रमित चमेरोबाट गाई गोरु संगुर जस्ता जनावरबाट मानिसमा सर्ने गर्छ ।

यो संक्रमणबाट बच्न गाइगोठ सफा राख्ने, फलफूल, तरकारी राम्ररी पखालेर र पकाएर मात्र खाने, मासु काट्दा पन्जाको प्रयोग गर्ने, भिडभाडमा जाँदा मास्कको प्रयोग गर्ने, पानी उमालेर पिउने गर्नुपर्छ ।