हेल्थ टिभी अनलाइन\ काठमाडौं : टेकुस्थित शुक्रराज ट्रपिकल तथा सरुवा रोग अस्पतालमा यतिखेर ५जनालाई आइसोलेसन वार्डमा राखिएको अस्पतालले जनाएको छ । रुघाखोकी लागेका यी पाँचैजना कोरोना प्रभावित क्षेत्रबाट आएका हुनाले विशेष निगरानी गरिएको पनि अस्पतालले जनाएको छ ।

शनिबार दुई जना आइतबार दुइ जना र सोमबार एक जना गरी जम्मा ५ जना टेकु अस्पतालमा कोरोनाको आशंकामा अस्पतालमा छन्। सोमबार चीनबाट आएका एक जना चिनियाँ नागरिकमा  रुघाखोकी देखिएपछि उनलाई पनि आइसोलेसन वार्डमा राखिएको अस्पतालले जनाएको हो ।

यी मध्ये ४ जना दक्षिण कोरियाबाट आएका नेपाली र एक जना चाइनिज रहेको इपिडिमियोलोजी तथा रोग नियन्त्रण महाशाखाका निर्देशक डा बासुदेव पाण्डेले बताए । उनले भने ‘सामान्य रुघाखोकी छ तर उहाँहरु कोरोना प्रभावित देशबाट आएकाले मात्र आइसोलेसनमा राखिएको हो ।’

उनीहरुको कोरोना परीक्षणका लागि नमुना संकलन भइसकेको र भोलिसम्म रिपोर्ट आउने पनि उनले जानकारी दिए । अहिलेसम्म परीक्षण गरिएका मध्ये एक जनामा बाहेक अन्यमा कोरोना भाइरस देखिएको छैन्।

हेल्थ टिभी अनलाइन \काठमाडौं:  कोरोना अति प्रभावित चीनको वुहानबाट उद्धार गरी नेपाल ल्याइएका १ सय ७५ जनामा नै कोरोना भाइरस नेगेटिभ देखिएको छ।

गत फागुण ४ गतेदेखि उनीहरुलाई खरिपाटीस्थित विद्युत तालिम केन्द्रमा क्वारेन्टाइनमा राखिएको थियो । उनीहरुको १४ औँ दिन गत शनिबार पुन दोस्रो चरणको परीक्षण गर्दा कोरोना संक्रमण नभेटिएको स्वास्थ्य मन्त्रालयका प्रवक्ता डा विकास देवकोटाले जानकारी दिए ।

योसँगै उनीहरु आजै क्वारेन्टाइनमुक्त हुनेछन्। चीनबाट ल्याइएका १ सय ७५ जनाकै ल्याएकै दिन पहिलो चरणको कोरोना परीक्षण गर्दा त्यसबेला पनि रिपोर्ट नेगेटिभ नै आएको थियो । उनीहरुलाई लिन गएका चालक दलका १८ जनाको भने हिजो नै नेगेटिभ रिपोर्ट आएपछि घर फर्किसकेका छन्।