हेल्थ टिभी अनलाइन\ काठमाडौं:  भारतको मुम्बईस्थित एक सञ्चारगृहका तीन जना पत्रकारलाई कोरोना संक्रमण भएको पुष्टि भएको छ।

संक्रमितमध्ये एकजनामा स्पष्ट कोरोनाको लक्षणहरु ज्वरो आउने,खोकी लाग्ने भएपछि शुक्रबार परीक्षण गरिएको हो।  फिल्डमा खटिएका उनको परीक्षण गर्दा कोरोना पोजेटिभ भएको रिपोर्ट आएको थियो । त्यसलगत्तै उनीसँगै एउटै कार्यकक्षमा कार्यरत अन्य दुई जनामा समेत परीक्षण गर्दा पोजेटिभ देखिएको बताइएको छ ।

तीनै जना संक्रमितलाई हाल मुम्बईको पवेईस्थित म्युनिसिपल कपासिटी बिल्डिङ एष्ड रिसर्च सेन्टरमा आइसोलेसनमा राखिएको छ।  तीन जनामा संक्रमण देखिएपछि सो सञ्चारगृहमा कार्यरत थप ३७ जनालाई परीक्ष्ण गर्दा रिपोर्ट नेगेटिभ आएको थियो । यद्यपी हाल उनीहरु सबैलाई १४ दिनका लागि क्वारेन्टाइनमा राखिएको सहायक कमिस्नर विनायक विस्पुतले जनाएका छन्।

क्वारेन्टाइनको व्यवस्था सञ्चारगृहले नै एक होटलमा मिलाएको छ ।

स्रोत:  मुम्बई मिरर

हेल्थ टिभी अनलाइन\बाँके : प्रदेश ५ सरकारका प्रवक्ता बैजनाथ चौधरीले कोभिड–१९ को रोकथाम तथा नियन्त्रणका लागि आवश्यक स्वास्थ्य सामग्री अभाव हुन नदिने बताएका छन्।

बाँकेमा कोरोना भाइरस संक्रमण रोकथामका लागि गरिएको तयारी तथा बाँकेको खजुरास्थित कोरोना विशेष अस्पताल सञ्चालन अवस्थाको जानकारी लिँदै भौतिक पूर्वाधार विकासमन्त्री चौधरीले कोरोना भाइरस संक्रमण रोकथाममा खटिएका स्वास्थ्यकर्मीलाई उच्च मनोबलका साथ काम गर्न आग्रह गरे।

मन्त्री चौधरीका अनुसार खजुरामा तयार भएको कोरोना विशेष अस्पताल सञ्चालनका लागि आवश्यक सामग्री प्रदेश सरकारले उपलब्ध गराउने छ।

कोभिड–१९ को रोकथाम तथा नियन्त्रणका लागि प्रदेश ५ सरकारको निर्णयानुसार खजुरास्थित सुशील कोइराला प्रखर क्यान्सर अस्पतालमा तयार गरिएको कोरोना अस्पतालमा ६ शय्याको सघन उपचार कक्ष, तीन शय्यामा भेन्टिलेटर र साधारण ४० शय्या रहनेछन्।