हेल्थ टिभी अनलाइन \काठमाडौं :  प्रेस काउन्सिल नेपालले स्वास्थ्य पत्रकार र चिकित्सकहरुसँग छलफल गरेको छ । शुक्रबार काउन्सिलमा आयोजित ‘महामारीमा स्वास्थ्य, मिडियामा रिपोर्टिङ र पेशागत आचारसंहिता विषयक छलफल कार्यक्रममा नेपाल चिकित्सक संघका पदाधिकारी एवं स्वास्थ्य पत्रकार मञ्चका पदाधिकारी र स्वास्थ्य पत्रकारको उपस्थिती रहेको थियो ।

कार्यक्रममा काउन्सिलका अध्यक्ष किशोर श्रेष्ठले कोरोनाको महामारीमा तीन वटा ‘स’ संचारकर्मी, स्वास्थ्यकर्मी र सुरक्षाकर्मी फ्रन्टलाइनमा रहेर खटिएको भन्दै संचारकर्मीको भूमिका यो बेला अझ शसक्त देखिएको जनाए । उनले स्वास्थ्यमा कलम चलाउने संचाकर्मीको सम्बन्ध स्वास्थ्यकर्मीसँग सुमधुर हुन जरुरी रहेको भन्दै भएका ग्यापलाई कसरी कम गर्न सकिन्छ भनेर छलफल शुरु गरिएको जनाए ।

यसैगरी कार्यक्रममा नेपाल चिकित्सक संघका अध्यक्ष डा लोचन कार्कीले स्वास्थ्य पत्रकारहरुले धेरै मानिसलाई जनस्वास्थ्यका विषयमा सुसूचित गराउन सहयोग गराउने भन्दै कहिलेकाही सूचना सही नहुँदा व्यक्ति र पेशा प्रति नै घृणा उत्पन्न हुने हुँदा यस्ता विषयको गाम्भीर्यतालाई बुझिदिन आग्रह गरेका थिए । उनले स्वास्थ्य पत्रकारहरुसँग संघ यसका लागि सहकार्य गरेर अघि बढ्न चाहेको पनि जिकीर गरे ।

यसैगरी कार्यक्रममा स्वास्थ्य पत्रकार मञ्चका अध्यक्ष कल्पना आचार्यले स्वास्थ्यमा लामो समयदेखि कलम चलाउने पत्रकारहरु स्वास्थ्यका विषयमा गम्भीर र संवेदनशिल रहेको भन्दै एक दुई जनाले गल्ती गरे भन्दैमा सबैलाई एउटै बास्केटमा राख्न नहुने बताईन्।

कार्यक्रमममा काउन्सिलले यो वर्ष धेरै गुनासा र उजुरी  स्वास्थ्यसँग सम्बन्धित समाचारमा आएको जानकारी गराएको थियो ।

हेल्थ टिभी अनलाइन\ डडेल्धुरा : सुदूरपश्चिममा २ हजार २ सय ९६ जना कोरोना संक्रमित डिस्चार्ज भएका छन्। यहाँका विभिन्न अस्पताल र स्थानीय तहमा बनाईएका आईसोलेसनबाट २ हजार २ सय ९६ जना कोरोना संक्रमित डिस्चार्ज भएका हुन्।

प्रदेशको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले नियमित प्रेस ब्रिफिङमा २ हजार २ सय ९६ जना कोरोना संक्रमित डिस्चार्ज भएको जानकारी दिए। उनका अनुसार शनिवार बिहान कञ्चनपुर जिल्लाका १६ जना डिस्चार्ज भएका छन्।

सामाजिक विकास मन्त्रालयका अनुसार अहिलेसम्म सबैभन्दा बढी अछामका ५ सय ४०, डोटीका ५ सय ३५, कञ्चनपुरका ४ सय ९८, बैतडीका २ सय ९९ र डडेल्धुराका २ सय ६७ जनााई डिस्चार्ज गरिएको छ। कैलालीका १ सय ३८, बझाङबाट ८७, दार्चुलाबाट १३ र बाजुराबाट २ जना संक्रमितलाई डिस्चार्ज गरिएको छ।

यस्तै हाल सुदूरपश्चिम प्रदेशका ५६ संक्रमितको विभिन्न अस्पतालमा उपचार भईरहेको छ भने बाँकी १ हजार ८ सय ८१ जना भने घर र स्थानीय तहको क्वारेन्टिनमा छन्। मन्त्रालयका अनुसार टीकापुर अस्पतालमा २३, महाकाली अस्पतालमा १८, जिल्ला अस्पताल अछाममा १०, मालाखेती अस्पतालमा ३ र डोटी अस्पतालमा २ जना गरी ५६ जनाको उपचार भईरहेको छ।

सुदूरपश्चिममा ८ जना संक्रमितको मृत्यु भईसकेको छ भने संक्रमितको सङख्या ४ हजार १ सय ८५ पुगेको छ ।