आसाम : भारत भारतको पूर्वी–उत्तर राज्य आसाममा विषाक्त मदिरा सेवन गर्दा मृत्यु हुनेको सङ्ख्या १०० भन्दा बढी पुगेको अधिकारीहरूले बताएका छन्।

दुई सयभन्दा बढी व्यक्तिलाई उपचारका लागि एउटा अस्पतालमा भर्ना गरिएको छ। बिरामीमध्ये महिलाहरू पनि छन्। उनीहरू सबै आसामको चिया बगानका कामदार हुन्।

स्थानीय सञ्चारमाध्यममा प्रकाशित विवरणहरूका अनुसार मृत्यु हुनेहरूको सङ्ख्या बढ्न सक्ने बताइएको छ। दुई हप्ताअघि अरू दुई राज्य उत्तर प्रदेश र उत्तराखण्डमा पनि विषाक्त मदिराका कारण झण्डै १०० को मृत्यु भएको थियो ।

आसामको गोलाघाट र जोरहाट जिल्लामा भएका बगानमा काम गर्ने मानिसहरूले विषाक्त मदिरा सेवन गरेका थिए। गोलाघाट जिल्लामा मात्रै ५८ जनाको मृत्यु भएको प्रहरी अधिकारी पुष्कर सिंहले बताए।

जोरहाट जिल्लामा १२ जनाको मृत्यु भएको छ। गोलाघाट स्वास्थ्य विभागका सहनिर्देशक डा. रतुल बोरदोलोईका अनुसार पीडितहरू बान्ता गर्दै र छाती दुख्ने एवं सास फेर्न गाह्रो हुने गम्भीर समस्यासहित अस्पताल पुगेका थिए।

राज्य प्रहरीका अनुसार अवैध मदिरा बेचेको आरोपमा एक जनालाई  पक्राउ गरिएको छ।  त्यस्तो मदिरा बिक्री रोक्न नसकेको भन्दै दुईजना अधिकारीहरूलाई पनि निलम्बन गरिएको जनाइएको छ।