हेल्थ टिभी अनलाइन\ काठमाडौं : सुदूरपश्चिममा अबका ५ दिनसम्म कोरोना परीक्षणका लागि स्वाब संकलन नहुने भएको छ । सुदूपश्चिम स्वास्थ्य निर्देशनालयले सम्पूर्ण निकायलाई परिपत्र गर्दै ५ दिनसम्मका लागि कोरोना परीक्षणका निम्ति नमुना संकलन नगर्न आग्रह गरेको छ ।

निर्देशनालयका निर्देशक डा गुणराज अवस्थीले हेल्थ टिभी अनलाइसँग कुरा गर्दै भने, ‘सुदूरपश्चिममा अहिले नै १ हजार ८३ जनाको स्वाब संकलन भएर परीक्षणका लागि राखिएको छ । तर हामीले दैनिक रुपमा परीक्षण गर्न सक्ने भनेको बढीमा २५० मात्र हो । यही हिसाबले परीक्षण गर्दा पनि हामीलाई ५ दिन लाग्छ । न त प्रयाप्त जनशक्ति छन्, नत  स्वाब स्टोर गर्ने उचित स्थान नै ।  देशमै सबभन्दा बढी लगभग ६० हजार मानिस क्वारेन्टाइनमा बसेको स्थानमा सरकारले केही त गर्नु पर्यो नि । हामीले कसरी व्यवस्थापन गर्ने ,उनले थपे ।

स्वास्थ्य मन्त्रालयका अनुसार बिहिबारसम्म सुदूरपश्चिममा ५८ हजार १ सय ६१ जना क्वारेन्टाइनमा रहेका छन्। नेपालीहरु भारतबाट आउने क्रम अझै बढ्दो छ । डा अवस्थीले स्वाब धेरै दिनसम्म होल्ड गरेर राख्दा त्यसको नतिजा सही नआउन सक्ने सम्भावना बढी भएकाले पनि अहिले केही दिनलाई संकलन कार्य रोक्न बाध्य भएको बताए ।