हेल्थ टिभी अनलाइन\ काठमाडौं: आज एकैदिन उदयपुरमा ११ जनामा कोरोना पोजेटिभ भएको पुष्टि भएको छ । योसँगै नेपालमा कोरोना संक्रमितको संख्या ४२ पुगेको छ ।

मंगलबार  बिहान कोशी अस्पतालमा गरिएको परीक्षणमा उदयपुरका ८ जनामा कोरोना पोजेटिभ देखिएको थियो । त्यसलगत्तै परीक्षणको क्रस भेरिफाई गर्नका लागि उनीहरुलाई धरानस्थित वीपी कोइराला स्वास्थ्य विज्ञान प्रतिष्ठान लगिएकोमा त्यहाँ पनि पोजेटिभ रिपोर्ट आएको थियो ।

उदयपुरको त्रियुगा नगरपालिका क्षेत्रका स्थानीयमा कोरोना संक्रमण परीक्षण गर्दा ११ जनामा पोजेटिभ देखिएको स्वास्थ्य मन्त्रालयका प्रवक्ता डा विकास देवकोटाले बताए । उनले काठमाडौंको टेकुस्थित राष्ट्रिय जनस्वास्थ्य प्रयोगशालामा २६० जनाको परीक्षण गरिएकोमा ३ जना र कोशी अस्पतालमा ६९ जनाको परीक्षण गरिएकोमा ८ जनामा कोरोना संक्रमण पुष्टि भएको जानकारी दिए ।