हेल्थ टिभी अनलाइन\गोरखा : र्‍यापिड डाइग्नोस्टिक टेष्टमा कोरोना पोजेटिभ देखिएका गोरखाको आरुघाट गाउँपालिका–५ का ३१ वर्षीय एक युवकमा संक्रमण नभएको पुष्टि भएको छ।

पोखरा स्वास्थ्य विज्ञान प्रतिष्ठानस्थित कोरोना परीक्षण प्रयोगशालामा आज गरिएको स्वाब परीक्षणका क्रममा ती युवकमा कोरोना संक्रमण नभएको पुष्टि भएको हो।

आरुघाट गाउँपालिकाभित्र मंगबार गरिएको र्‍यापिड डाइग्नोस्टिक टेस्ट (आरडीटी) का क्रममा कोरोना पोजेटिभ देखिएका युवकको पीसीआर टेष्टको रिपोर्ट नेगेटिभ आएको गोरखा अस्पतालका कोभिड–१९ का फोकलपर्सन नारायण अर्यालले जानकारी दिए। गत फागुन २२ गते बहराइनबाट फर्किएका ती युवकलाई क्वारेन्टाइनमा राखिएको थियो ।

गोरखाका ११ वटै स्थानीय तहमा भारतलगायत देशबाट आएकाको र्‍यापिड डाइग्नोस्टिक टेष्ट भइरहेको छ। चैत १ गतेदेखि यता ३१४ जना जिल्लामा प्रवेश गरेको स्वास्थ्य कार्यालय गोरखाले जनाएको छ।