हेल्थ टिभी अनलाइन \काठमाडौं:  नेपालमा हालसम्म पीसीआर प्रविधिबाट ५ हजार १ सय ८४ जनाको कोरोना नमुना परीक्षण गरिएको छ । यसैगरी र्यापिड डाइग्नोष्टिक किट मार्फत ३ हजार ३ सय २१ जनाको परीक्षण गरिएको स्वास्थ्य मन्त्रालयका प्रवक्ता डा विकास देवकोटाले जानकारी दिए ।

२४ घण्टामा ७ सय ९५ जनाको परीक्षण भएको र ती मध्ये ३ जनामा संक्रमण देखिएको डा देवकोटाले जानकारी दिए । आज कोरोना संक्रमण पुष्टि भएकाहरु भारतीय हुन्। ३७, ४४ र ५५ वर्षका पुरुषमा कोरोना पोजटिभ देखिएको हो । योसँगै नेपालमा कोरोना पुष्टि भएकाको संख्या १२ पुगेको छ ।

पर्साको बिरगंज महानगरपालिका छपकैयास्थित मस्जिदमा शंकास्पदरूपमा रहेका २१ जनाको परिक्षण गर्दा त्यस मध्ये तीन जनामा कोरोना देखिएको हो । उनीहरुलाई नारायणी अस्पतालमा आइसोलेसनमा राखिएको छ ।

आजसम्म क्वारेन्टाइनमा रहेकाको संख्या ७ हजार ९ सय ९३ छ । यसैगरी विभिन्न अस्पतालमा आइसोलेसनमा रहेकाहरुको संख्या ८५ रहेको छ ।