हेल्थ टिभी अनलाइन \काठमाडौं:  कोरोना आशंकामा देशभरीका विभिन्न अस्पतालमा १०७ जना आइसोलेसनमा रहेको स्वास्थ्य मन्त्रालयले जनाएको छ । सोमबार स्वास्थ्य मन्त्रालयले गरेको नियमित मिडिया ब्रिफिङमा मन्त्रालयका प्रवक्ता डा विकास देवकोटाले उपत्यका लगायतका अन्य अस्पतालमा १०७ जना आइसोलेसनमा उपचारमा रहेको बताएका हुन्।

ती मध्ये ८ जना भने संक्रमित रहेका छन।  देवकोटाले १२ जना उपत्यकामा र ९५ जना उपत्यकाका विभिन्न अस्पतालमा आइसोलेसन वार्डमा रहेको जानकारी दिए । यसैगरी देशभरी कोरोना प्रभावित देशहरुबाट आएका र उनीहरुका परिवार समेत गरी ९ हजार १ सय ६८ जना क्वारेन्टाइनमा रहेको पनि उनले जानकारी दिए ।

कोरोना रोकथाम तथा नियन्त्रणका लागि सरकारले कोरोनाको नमुना परीक्षण थप तीन स्थानबाट शुरु गरेको उनले बताए । भरतपुर, धुलिखेल र भैरहवामा पनि आजैबाट कोरोनाको नमुना परीक्षण शुरु भएको छ ।

योसँगै संक्रमित फेला परेका र उच्च जोखिममा रहेका कैलाली, कञ्चनपुर र बाग्लुङमा र्यापिड टेष्ट किट मार्फत परीक्षण शुरु गर्न पहल भइसकेको र छिटै शुरु हुने उनले बताए ।आजका मितिसम्म १ हजार ६ सय ९७ जनाको नमुना परीक्षण गरिएको छ ।