हेल्थ टिभी अनलाइन\काठमाडौं : प्रधानमन्त्री केपी शर्मा  ओलीको शरीरमा अब चारवटा मिर्गौला हुने भएको छ। त्रिवि शिक्षण अस्पतालमा बुधवार प्रधानमन्त्रीको मिर्गौला प्रत्यारोपण गरिँदैछ।

यसअघि २०६४ साउनमा पनि मिर्गौला प्रत्यारोपण गरिएको थियो। बिग्रिएका नफालिकन नयाँ मिर्गौला राखिएकाले प्रधानमन्त्री ओलीको शरीरमा यसअघि नै तीनवटा मिर्गौला थिए।

बुधवार प्रत्यारोपण पूरा भए पछि अब उनको शरीरमा चारवटा मिर्गौला रहनेछ। मिर्गौला प्रत्यारोपण गर्दा सामान्यतयाः शरीरमा रहेको मिर्गौला नफालिकन नयाँ मिर्गौला राखिने विशेषज्ञहरू बताउँछन्।

१२ वर्षअघि भारतको एपोलो अस्पतालमा उनको पहिलोपटक मिर्गौला प्रत्यारोपण गरिएको थियो। त्यो मिर्गौलाले पनि काम गर्न छाडेपछि अर्को मिर्गौला राख्न लागिएको हो। पहिले प्रत्यारोपण गरिएको मिर्गौला शरीरमा जेलिएर बसेको हुनाले त्यसलाई हटाउन कठिन हुने भएकाले प्रत्यारोपण गर्दा पुरानो नफालिने चिकित्सकहरुले बताएका छन्।

पहिलोपटक बुहारी नाता पर्नेबाट मिर्गौला लिएका उनले यो पटक भाञ्जीको मिर्गौला लिँदै छन्।