काठमाडौं : चितवनको भरतपुर महानगरपालिकाले सार्वजनिक स्थलहरूमा धूमपान र सुर्तीजन्य पदार्थ सेवन नगर्न सचेत गराएकाे छ।

सूचना निकालेर महानगरपालिकाले सुर्तीजन्य पदार्थ नियन्त्रण र नियमन गर्ने ऐनको दफा अनुसार सार्वजिनक स्थलमा सुर्तीजन्य पदार्थ सेवनमा राेक लगाएकाे हाे। यस्तै शिक्षण तथा स्वास्थ्य संस्थाको कम्तीमा १०० मिटर वरपर सुर्तीजन्य पदार्थ बिक्री नगर्न पनि सचेत गराइएको छ।

विद्यालय, स्वास्थ्य संस्था, बालकल्याण गृह, शिशुस्यहार केन्द्र, वृद्धाश्रम अनाथालयलगायत क्षेत्र र नेपाल सरकारले राजपत्रमा प्रकाशन गरी तोकको सार्वजनिक स्थलबाट १०० मिटर वरपर सुर्तीजन्य पदार्थ बिक्री वितरण नगर्न नगरवासीलाई सचेत गराएको हो।

उसले १८ वर्ष नपुगेका व्यक्ति र गर्भवतीलाई यस्ता वस्तु बिक्री वितरण नगर्न पनि भनेको छ। ‘महानगरभित्र यस्ता कुनै क्रियाकलाप गरेको कहीँ कतै पाइएमा यस विषयमा अनुगमन गर्न खटिएको टोलीले तत्काल कानुनबमोजिम सजाय गर्ने व्यहोरा जानकारी गराइन्छ’, सूचनामा भनिएको छ।