२० माघ २०७६ , सोमवार

१३ जिल्लामा शनिवारदेखि खुवाइँदै हात्तीपाइले रोगविरुद्ध औषधि

काठमाडौं : सरकारले यही माघ २५ गतेदेखि १३ जिल्लामा हात्तीपाइले रोगविरुद्ध औषधि खुवाउने अभियान सञ्चालन गर्ने भएको छ।

सोमवार पत्रकार सम्मेलन गरी इपिडिमियोलोजी तथा रोग नियन्त्रण महाशाखाका निर्देशक डा. विवेक लालले ‘हात्तीपाइले रोग निवारणका लागि औषधि सेवन अभियान २०७६’ सञ्चालन गर्न लागेको जानकारी दिए। १३ जिल्लाका १३८ स्थानीय तहमा औषधि खुवाउने उनले बताए।

यो कार्यक्रममार्फत ७४ लाख ६१ हजारलाई औषधि खुवाउने लक्ष्य लिएको उनको भनाइ छ। औषधि सेवन कार्यक्रममा पाँच हजार ८८५स्वास्थकर्मी र १० हजार ८३८ स्वास्थ्य स्वयंसेविका परिचालन गरिनेछ।

कार्यक्रममा स्वास्थ्य सेवा विभागका महानिर्देशक रोशन पोख्रेलले औषधिबारे भ्रम फैलाइएकाले हात्तीपाइले रोग नियन्त्रण हुन नसकेको तर्क गरे। औषधिबारेको भ्रम चिर्न सञ्चारमाध्यम सहयोगी हुने उनको विश्वास छ।

हेल्थ टिभी अनलाइन

हेल्थ टिभी अनलाइन स्वास्थ्य विधामा नेपाली पत्रकारिता इतिहासकै पहिलो श्रव्यदृश्य केन्द्रित मल्टी मिडिया अनलाइन पोर्टल हो। जनस्वास्थ्य समस्या, रोग र उपचार, चिकित्सा विज्ञान र शिक्षा, आयुर्वेद, स्वास्थ्य प्रविधि, प्राकृतिक चिकित्सा, जीवनशैलीलगायतका सवालमा समाचार, टिप्पणी, विचार, विज्ञको राय, अन्तरवार्ता, छलफल र संवादमार्फत विश्वव्यापी रूपमै पाठक, श्रोता र दर्शकलाई सचेत गराउने कार्यमा हेल्थ टिभी अनलाइन कटिबद्ध छ।