नेपाली समाजमा माघे संक्रान्तिका दिन अन्य खाद्यपदार्थका साथै खिचडी खाने परम्परा छ। विशेषगरी स्थानीय दाल, चामल र घिउबाट बन्छ खिचडी। बेसार, अदुवा र स्वादअनुसार नुन हालेपछि खिचडी बन्छ। त्यसो त स्वादमा विविधता थप्न साग, आलु, गोलभेडाजस्ता तरकारी मिसाएर पनि खिचडी बनाउन सकिन्छ।

पोषण र स्वास्थ्यका दृष्टिले खिचडी अत्यन्तै लाभदायक खानेकुरा हो। माघेसंक्रान्ति मात्र होइन जाडोभरको उत्कृट खाना हो खिचडी। यसले शरीरलाई न्यानो बनाउँछ र उर्जाशील बनाउँछ। यसमा कार्बोहाइड्रेट, भिटामिन, क्याल्सियम, म्याग्नेसियम र फाइबरजस्ता पदार्थ पाइन्छ।

नरम किसिमको खानेकुरा भएकोले यो पचाउन सजिलो हुन्छ। पोषण तत्त्वयुक्त हुने भएकोले यसले शरीरमा रोगप्रतिरोधी क्षमतालाई मजबुत बनाउन सहयोग गर्छ । पित्त तथा कफको समस्यामा पनि खिचडी लाभदायक हुन्छ।

बढ्ने उमेरका नानीबाबुलाई अन्य खाजाको सट्टा खिचडी ख्वाउनु प्रभावकारी मानिन्छ। बिरामी भएका मानिसलाई खुवाउँदा चाँडो तागत आउँछ।

एजेन्सीकाे सहयाेगमा