जनकपुर : पत्रकारहरूका लागि प्रजनन स्वास्थ्य, लैंगिकता, युवा तथा जनसंख्यासम्बन्धी तीनदिने अभिमुखीकरण तालिम शुरु भएको छ।

सामाजिक विकास मन्त्रालय, महिला सशक्तिरण अभियान र यूयनफपीएको संयुक्त आयोजनामा भएको उक्त कार्यक्रममा धनुषा, सर्लाही र रौतहटका ३० जना पत्रकार सहभागी छन्।

कार्यक्रमको उद्घाटन गर्दै प्रदेश २ सामाजिक विकास मन्त्रालयका स्वास्थ्य महाशाखा प्रमुख नवलकिशोर झाले स्वास्थ्य सम्बन्धी सूचना सबैसम्म पुर्याउन मिडियाको भूमिका महत्त्वपूर्ण हुने बताए।

तीनदिन चल्ने तालिममा प्रजनन स्वास्थ्य, परिवार नियोजन, किशोरावस्था लगायतका विषयमा कसरी रिपोर्टिङ गर्ने भन्ने विषयमा छलफल हुने आयोजकको भनाइ छ ।

तालिममा सहभागी पत्रकारहरूले स्वास्थ्यको विषय अझै प्राथमिकतामा नपरेको बताए। उनीहरूले सञ्चार माध्यमले पनि राजनीतिसम्बन्धी नै समाचार खोज्ने गरेको बताए। उनीहरूले स्वास्थ्यमा रिपोर्टिङ गर्न प्राविधिक कुराले समस्यामा पार्ने गरेको अनुभव सुनाए।