झापा : क्यान्सरप्रभावित कनकाई नगरपालिका–३ का ५६ वर्षीय चानक उप्रेतीलाई बचाउन उहाँको परिवारले आर्थिक सहयोगका लागि अपिल गरेको छ।

उप्रेतीलाई खाना नलीमा क्यान्सर भएकाे हाे। काठमाडौँको त्रिवि शिक्षण अस्पतालदेखि भारतको दिल्लीस्थित राजीव गान्धी क्यान्सर अस्पताल उपचारका क्रममा ७० लाख भन्दा बढी भइसकेकाे परिवारले बताएकाे छ।

श्रीमती अम्बिकादेवीका अनुसार सरकारी जागिरबाट रिटायर्ड भएपछि प्राप्त ४० लाख र आफन्तसँग सापटी लिएकाे ३० लाख रूपैयाँ खर्च भइसकेको छ। उपचारमा अब २० लाख आवश्यक भएको चिकित्सकले बताएको उनले बताइन्।

पारिवारका स्रोतका अनुसार चिकित्सकले खाना नलीको क्यान्सर निर्मूल गर्न केमो पद्धतिबाट उपचार जारी राख्नुपर्ने बताएका छन्। ‘उहाँले स्वस्थ रहुञ्जेल राष्ट्रसेवक भएर देशको सेवा गर्नुभयो। क्यान्सरसँग लडिरहनुभएको यो अवस्थामा अब उहाँलाई बचाउनका लागि आर्थिक सहयोग गरिदिनु हुन देश–विदेशमा भएका सम्पूर्ण नेपालीमा अपिल गर्दछुु’, अम्बिकादेवीले आफ्नो अपिलमा भनेकी छिन्।