काठमाडौं : सरकारले राष्ट्रिय चिकित्सा शिक्षा आयोगको उपाध्यक्षका लागि पुनः दरखास्त आह्वान गरेको छ। पुरानो दरखास्त अयोग्य भएको भन्दै उपाध्यक्षका लागि नाम सिफारिस गर्न गठित सिफारिस समितिले यसअघि आवेदन हालेका ६ जनाको दरखास्त रद्ध गरेको हो।

सिफारिस समितिले असार ९ गते पहिलो पटक आयोगको उपाध्यक्षका लागि दरखास्त आव्हान गरेको थियो । जसमा छ जनाले दरखास्त हालेका थिए । सो सूचनामा उपाध्यक्षमा दरखास्त आव्हान गर्नका लागि ६१ वर्ष ननाघेको हुनुपर्ने सीमा निर्धारण गरिएको थियो । तर, पुनः आव्हान गरिएको दरखास्तमा ४५ वर्ष पूरा भै ६५ वर्ष ननाघेको हुनुपर्ने मापदण्ड बनाइएको छ ।

यसअघि आवेदन दिनेमा डा निलमणि उपाध्याय, डा श्रीकृष्ण गिरी, डा.प्रमोद शर्मा, डा पारस पोखरेल, डा निलाम्बर झा र डा रमेश सिंह थिए ।

नयाँ सूचना अनुसार साउन १५ गतेसम्म उपाध्यक्षका लागि इच्छुक उम्मेदवारले आवश्यक प्रक्रिया पुरा गरी दरखास्त हाल्न सक्नेछन्।