जुम्ला : जिल्लास्थित पाँच विद्यालयका दुई हजार ५४० विद्यार्थीले स्वास्थ्योपचार पाएका छन्।

कर्णाली मावि अनामनगर, चन्दननाथ नमुना मावि खलङ्गा बजार, रत्नचुण्डेश्वर मावि बोहोरागाउँ, जनता प्राविधिक मावि महतगाउँ र जनज्योति मावि बारकोटे वाडाका विद्यार्थीले क्षयरोग र मुटुरोग सम्बन्धी उपचार पाएको कर्णाली माविका प्रधानाध्यापक मीनराज शर्माले जानकारी बताए।

तीमध्ये चार विद्यार्थीको शल्यक्रिया गर्नुपर्ने, छ जनाले सामान्य औषधि खानुपर्ने र १० मुटुरोग भएकाहरूको छालाको उपचार र शल्यक्रिया गर्नुपर्ने देखिएको बताइएको छ।

यस्तै छ जनामा बाथ मुटुरोग र १४ जनामा जन्मजात मुटुरोगको समस्या देखिएको उपचारमा संलग्न स्वास्थ्यकर्मीले बताए।

नेपाल क्षयरोग निवारण प्रतिष्ठान जिल्ला शाखा जुम्लाको आयोजना र नेपाल क्षयरोग निवारण प्रतिष्ठानको प्राविधिक सहयोगमा चन्दननाथ नगरपालिकाभित्रका माध्यमिक विद्यालयमा अध्ययनरत छात्राछात्रको मुटुजाँच गरिएको हो।