सिन्धुली:  फिक्कल गाउँपालिकाले ४३० गर्भवती र सुत्केरीको घरमा पहिचान स्टिकर टाँसेको छ। गाउँपालिकाले गर्भवती र सुत्केरी तथा दुई वर्षमुनिका बालबालिकाको पहिचान गरी सेवाका लागि स्टिकर टाँसेको हो।

सुरक्षित मातृत्व र पोषणका लागि गर्भवती र सुत्केरी पहिचन गर्न दुई किसिमका स्टिकर टाँसेको गाउँपालिकाकी उपाध्यक्ष पार्वती सुनुवारले बताइन्।

एउटा स्टिकरमा ‘कम्तीमा चारदेखि ९ पटकसम्म गर्भजाँच गराऔँ’ लेखिएको छ भने अर्कोमा ‘स्तनपान अमृत समान र सुरक्षित मातृत्व र पोषणमा ध्यान दिऔँ’ नारा लेखिएको छ। यस्ता स्टिकर गर्भवती र सुत्केरीको घरमा सबैले देख्ने स्थानमा टाँसिएको गाउँपालिकाले जनाएको छ।

समयमा गर्भजाँच नगराई घरमै सुत्केरी गराउँदा महिलाको मृत्युको क्रम बढ्न थालेपछि गाउँपालिकाले विशेष कार्यक्रम तय गर्दै स्टिकर टाँस्ने निर्णय गरेको हो। गर्भवतीलाई गर्भजाँच गराउन स्वास्थ्य संस्था जाँदा र फर्किँदा नि:शुल्क एम्बुलेन्स सेवा, सुत्केरी महिला र शिशुका लागि पौष्टिक आहार तथा गर्भजाँच गराएवापत तीन हजार आठ सय रुपैयाँ प्रोत्साहन भत्ता समेत दिइने गरिएको छ।

गर्भवती र सुत्केरीको स्वास्थ्यलाई ध्यान दिँदै फिक्कल गाउँपालिकाले सुरक्षित मातृत्व तथा पोषणसम्बन्धी कार्यक्रम सञ्चालन गरेको छ।