कैलाली : लम्कीचुहा नगरपालिका–१० चुहामा सामुदायिक अस्पतालको शिलान्यास गरिएको छ। ५१ शय्या हुने अस्पतालको शिलान्यास सांसद झपट रावलले गरेका हुन्।

लम्कीचुहाका प्रमुख महादेव बजगाईँले गाडी किन्नका लागि छुट्याएको रकम अस्पताल निर्माणमा खर्च गर्ने निर्णय गरेपछि लम्कीमा अस्पताल निर्माण हुन लागेको बताइएको छ। नगरपालिकाले गाडी किन्न छुट्याएको ७५ लाख रुपैयाँ छुट्याएको थियो। नगरकार्यपालिकाको बैठकले थप १५ लाख रुपैयाँ थपेपछि अस्पताल निर्माणमा ९० लाख रुपैयाँ खर्च गरिने भएको छ।

३२ करोड लागत अनुमान गरिएको अस्पतालमा सांसद रावलले पूर्वाधार विकास कोषबाट रु एक करोड १० लाख र सुदूरपश्चिम प्रदेशसभा सदस्य नन्दबहादुर साउदले पूर्वाधार विकास कोषबाट एक करोड १३ लाख रुपैयाँ विनियोजन गरेका छन्।

दुई वर्षमा निर्माण सम्पन्न गरिसक्ने लक्ष्य लिइएको अस्पतालका लागि आवश्यक जग्गा चुहास्थित राष्ट्रिय नवजागृति माध्यमिक विद्यालयले साढे पाँच बिघा जमीन निःशुल्क उपलब्ध गराएको छ ।