काठमाडौं : विश्व सुर्तीजन्य पदार्थ रहित दिवसको अवसर पारेर ‘सुर्तीजन्य पदार्थ होइन, स्वास्थ्य रोजौं’ भन्ने शिर्षकमा माध्यमिक विद्यालय स्तरीय वक्तृत्व कला प्रतियोगिता भएको छ ।

स्वास्थ्य मन्त्रालय अन्तर्गतको राष्ट्रिय स्वास्थ्य, शिक्षा सूचना तथा सञ्चार केन्द्र, एक्सन नेपाल र विश्व स्वास्थ्य संगठनकाे आयोजनामा भएको उक्त कार्यक्रममा काठमाडौं महानगरपालिका अन्तर्गतका सामूदायिक विद्यालयका कक्षा ९ र १० मा पढ्ने विद्यार्थीहरुको सहभागिता थियो ।

सूर्तीजन्य पदार्थ सेवनले गर्ने हानीकाबारेमा विद्यालयस्तरबाटै सचेत गराउने उद्धेश्यले विद्यार्थीहरुविच यसका बारेमा प्रतियोगिता गराइएको सुर्तीजन्य पदार्थ नियन्त्रण तथा स्वास्थ्य प्रवर्धन शाखाका प्रमुख डा भक्तबहादुर केसीले जानकारी दिए ।
प्रतियोगिता गत सोमबार बानेश्वस्थित रत्नराज्य उच्च माध्यमिक विद्यालयमा भएको थियो जसमा ११ वटा विद्यालयका २० जना विद्यार्थी सहभागी भएका थिए ।

यसैगरी मंगलबार जनप्रभात माध्यमिक विद्यालयमा भएको प्रतियोगितामा १७ वटा विद्यालयका ३३ जना विद्यार्थी सहभागी भएका डा केसीले बताए । वतृत्व प्रतियोगितामा प्रथम द्धितिय र तृतिय हुने विद्याथीलाई ३१ मे अर्थात विश्व सुर्तीजन्य पदार्थ रहित दिवसका दिन प्रमाणपत्र एवम पुरस्कार प्रदान गरिनेछ ।